Qazaqstan Aýǵanstanmen saýda, kólik jáne ónerkásip salalaryndaǵy áriptestikti keńeıtedi
ASTANA. KAZINFORM — Qazaqstan Premer-mınıstriniń orynbasary — ulttyq ekonomıka mınıstri Serik Jumanǵarın Kabýlǵa sapary barysynda Aýǵanstan Premer-mınıstri Muhammed Hasan Ahýndpen jáne Premer-mınıstrdiń orynbasary Abdýl Ganı Baradarmen kelissózder júrgizdi.
Úkimettiń baspasóz qyzmetiniń habarlaýynsha, taraptar aýqymdy gýmanıtarlyq, saýda-ekonomıkalyq jáne ınvestıtsııalyq yntymaqtastyq máselesin talqylady.
Serik Jumanǵarınniń Aýǵanstan Premer-mınıstrimen kezdesýi eki el arasyndaǵy gýmanıtarlyq jáne iskerlik baılanystardyń belsendi damýynyń sońǵy tórt jylynda alǵash ret ótkizildi. Muhammed Hasan Ahýnd qazaqstandyq delegatsııany jyly qarsy alyp, aýǵan halqyna dáıekti qoldaý kórsetkeni úshin Qazaqstan Prezıdentine rızashylyǵyn bildirdi.
Gýmanıtarlyq kómekti turaqty jetkizýden basqa, Qazaqstan Aýǵanstanǵa kadr daıarlaýda járdem kórsetip, qazaqstandyq joǵary oqý oryndarynda aýǵan stýdentterin oqytý úshin bilim berý granttaryn usynady, el turǵyndaryna medıtsınalyq kómek kórsetip, mamandardyń biliktiligin arttyrýda.
Kelissózderde taý-ken metallýrgııa keshenindegi yntymaqtastyq perspektıvalaryna erekshe nazar aýdaryldy.
Qazaqstan Ortalyq Azııanyń taý-ken metallýrgııa salasynda tústi, qara metall, jerde sırek kezdesetin jáne baǵaly metaldardy qaıta óńdeý quzyretine ıe ónerkásiptik jáne tehnologııalyq ortalyq retinde mańyzdy pozıtsııany ıelenedi. Qazaqstan tehnıkalyq akvamarındi qaıta óńdeý boıynsha quzyreti bar álemdegi úsh eldiń qataryna kiredi. Osyǵan baılanysty qazaqstandyq kompanııalar paıdaly qazba ken oryndaryn ıgerýge qatysýǵa jáne Aýǵanstandaǵy ónerkásiptik jobalardy júzege asyrýǵa qyzyǵýshylyq tanytýda. Atap aıtqanda, Aýǵanstan Premer-mınıstriniń orynbasarymen kezdesýde qazaqstandyq tarap osy mıneraldy Aýǵanstannan shyǵaryp, Qazaqstanda qaıta óńdeýdi sheshý týraly másele kóterdi.
Sondaı-aq ótken jylǵy qazanda «Taý-Ken Samuryq» kompanııasynyń mamandary Bamıan provıntsııasyna baryp, Pamı-Kakrak myrysh ken ornynda synama aldy. «Qazmyrysh» kompanııasynyń mamandary júrgizgen keıingi hımııalyq taldaý qazaqstandyq kásiporyndarda osy kendi qaıta óńdeýdiń qaǵıdatty múmkindigin rastady.
— Biz Aýǵanstannan myrysh kenin jetkizýge múddelimiz. Qazaqstandyq kásiporyndar óndiristerdi tehnologııalyq jańartý, ınjınırıng, jabdyqtardy jetkizý jáne iske qosý-jóndeý jumystaryn súıemeldeý salasynda qajetti quzyretterge ıe, — dep atap ótti Serik Jumanǵarın.
Hrom ken oryndaryn barlaý men damytýǵa ERG qatysýy jeke baǵyt bolady. Álemdegi eń iri hrom keni resýrstyq bazasyna ıe jáne ferrohrom óndirisinde álemdik kóshbasshy bola otyryp, ERG qol jetkizilgen ýaǵdalastyqtar sheńberinde óziniń tájirıbesin, salalyq saraptamasyn jáne tehnologııalyq sheshimderin qoldaný múmkindigin qarastyrady.
Abdýl Ganı Baradarmen kezdesýde taraptar kólik-logıstıkalyq yntymaqtastyqty damytý máselesin talqylady.
Qazaqstan Haft — Gerat temirjol ýchaskesiniń qurylysyn aıaqtap jatqany jáne Aýǵanstan aýmaǵyndaǵy ınfraqurylymdyq jobalarǵa odan ári qatysýǵa múddeli ekeni atap ótildi.
— Biz Pákistannyń Karachı jáne Gvadar porttary baǵytynda 10 mln tonnaǵa deıin júk tasymaldaýdy qamtamasyz etýge qabiletti Central Asia-South Asia (CASA) Transaýǵandyq kólik dálizin iske asyrýdy qoldaımyz. Sonymen qatar, biz ózbek jáne túrkimen áriptestermen birge Mazarı-Sharıf jáne Týrgýndı arqyly Geratqa temir jol qurylysyna qatysýǵa daıynbyz, — dep atap ótti Serik Jumanǵarın.
Kelissózder barysynda ózara saýda-sattyqty odan ári keńeıtý máselesine aıryqsha nazar aýdaryldy.
Taraptar aýǵan aýyl sharýashylyǵy ónimderin Qazaqstandaǵy Small jáne Magnum sekildi iri saýda jelilerine jetkizý týraly ýaǵdalastyqty rastady. Qazaqstan óńir elderi arasynda birinshi bolyp Aýǵanstanǵa ulttyq saýda jelileri arqyly ónim jyljytýdy usyndy.
Munda anar, júzim, órik, qara órik, qarbyz, qaýyn, erte kókónister, jańǵaqtar jáne basqa da jemis-kókónis ónimderin jetkizý týraly sóz bolyp otyr.
Sondaı-aq qazaqstandyq tarap Aýǵanstanǵa, atap aıtqanda Geratqa un jetkizý kóleminiń arttyrylǵany týraly habardar etti.
Kelissózder qorytyndysy boıynsha taraptar qol jetkizilgen ýaǵdalastyqtardy, atap aıtqanda, qarjy salasynda ózara esep aıyrysý úshin iske asyrýǵa kedergi keltiretin qoldanystaǵy kedergilerdi talqylady. Olardy joıýdyń naqty sharalary ázirlendi. Saýda, kólik, ónerkásip, telekommýnıkatsııa jáne gýmanıtarlyq ózara is-qımyl salalaryndaǵy yntymaqtastyqty odan ári keńeıtýge ózara múddelilik rastaldy.
Buǵan deıin Qazaqstan Aýǵanstanǵa 319 tonna gýmanıtarlyq kómek pen dárigerler tobyn jibergenin jazǵanbyz.
