Qazaqstan Aýǵanstanǵa temirjol qurylysy materıaldaryn jetkizýi múmkin

ASTANA. KAZINFORM — Elimiz Aýǵanstanǵa rels, shpal basqa da temirjol qurylysyna qajetti materıaldardy jetkizýdi josparlap otyr. Bul týraly Kólik vıtse-mınıstri Maqsat Qalıaqparov málim etti.

— Iá, bizde mundaı joba bar. Ózderińiz biletindeı, Soltústik-Ońtústik halyqaralyq kólik dálizi óte perspektıvaly baǵyt jáne Gerat aımaǵyndaǵy alǵashqy ýchaskelerdiń biri. Osy oraıda rels, shpal shyǵaratyn otandyq kompanııalardy qatystyrýdy, ıaǵnı jetkizýdi josparlap otyrmyz, — dedi Maqsat Qalıaqparov elordada ótken «Kólik jáne logıstıka naryǵy» VI halyqaralyq konferentsııasy jáne GLOBAL Avia DAY áýe tasymaldaryn damytý jónindegi I halyqaralyq forýmy barysynda BAQ ókilderiniń saýalyna jaýap bere turyp. 

Vıtse-mınıstrdiń aıtýynsha, búginde Aýǵanstanda temirjol salǵan qazaqstandyq kompanııa bar. 

— Ol jaqta jobasyn júzege asyryp jatqan otandyq Integra kompanııasy bar. Kompanııa Aýǵanstan men Iran arasynda Aýǵanstan qarajaty esebinen temirjol saldy. Bul joba iske asyryldy jáne biz osy tájirıbeni odan ári qoldanýdy josparlap otyrmyz. Birinshi kezeńde biz materıaldardy jetkizý boıynsha kelissózder júrgizemiz. Búgingi tańda kelissózder júrip jatyr, biraq is júzinde áli qujattar joq, — dep tolyqtyrdy mınıstrdiń orynbasary.

Buǵan deıin Qazaqstan, Ázerbaıjan jáne Grýzııa arasynda biryńǵaı temirjol ákimshiligi qurylatyny týraly habarlaǵan edik.