Qazaqstan Aýǵanstanǵa sybaılas jemqorlyqqa qarsy júıeni qalyptastyrýǵa kómektesedi

KABÝL. QazAqparat - Sybaılas jemqorlyqqa qarsy is-qımyl agenttigi tóraǵasynyń orynbasary Oljas Bektenov Aýǵanstan astanasy Kabýlǵa saparmen bardy, dep habarlaıdy QazAqparat agenttiktiń baspasóz qyzmetine silteme jasap.

Oljas Bektenov Aýǵanstannyń Bas prokýrorymen, Ádilet mınıstrimen, sybaılas jemqorlyqqa qarsy ortalyq pen Joǵarǵy sotttyń sot basqarmasynyń basshylarymen kezdesti.

Aýǵanstannyń Bas prokýrory Mohammad Farıd Hamıdımen kelissóz aıasynda taraptar vedomstvoaralyq yntymaqtastyq týraly memorandým jasasýǵa kelisti.

«O.Bektenov Qazaqstannyń Aýǵanstandaǵy jaǵdaıdyń jyldam turaqtalýyna múddeli ekenin jetkize otyryp, agenttiktiń dostas eldiń quzyretti organdaryn, atap aıtqanda aýǵandyq áriptesterdi Qazaqstanda turaqty túrde qysqa merzimdi oqytý, onlaın-semınarlar men biliktilikti arttyrýdyń basqa túrlerin uıymdastyrý arqyly jan-jaqty qoldaýǵa daıyn ekendigin bildirdi», delingen habarlamada.

Sonymen qosa, Oljas Bektenov Aýǵanstannyń amerıkalyq ýnıversıtetiniń stýdentterimen jáne oqytýshylarymen kezdesti.

Qazaqstannyń sybaılas jemqorlyqqa qarsy keshendi saıasat qalyptastyrýdaǵy, memlekettik qyzmetti tsıfrlandyrýdaǵy, qoǵamda parasattylyq ıdeologııasyn qalyptastyrýdaǵy tájirıbesi aýdıtorııada qyzyǵýshylyq týdyrdy.

Kezdesý qorytyndylary boıynsha agenttiktiń qyzmetkerleri men tanymal qazaqstandyq sarapshylardyń ýnıversıtet stýdentterine vıdeobaılanys arqyly lektsııalar men semınarlar ótkizýi týraly kelisimge qol jetkizildi.

Islam respýblıkasyna sapar Qazaqstannyń sybaılas jemqorlyqqa qarsy qyzmetiniń aýǵandyq áriptesterin eldegi zańdylyq pen quqyqtyq tártipti qalpyna keltirýdegi qoldaýy boıynsha júıeli jumysynyń kezekti qadamy boldy.