Qazaqstan Aýǵanstanǵa ne úshin kómektesip keledi?
ASTANA. QazAqparat - Búgin Májilistiń Halyqaralyq ister, qorǵanys jáne qaýipsizdik komıtetinde «Damýǵa resmı kómek týraly» zań jobasy sheńberindegi Qazaqstannyń basqa memleketterge kómek kórsetý týrasynda dóńgelek ústel ótti. Jıynǵa jetekshilik etken komıtet tóraǵasy Máýlen Áshimbaev sóz arasynda Qazaqstannyń Aýǵanstanǵa, sol sekildi basqa da elderge ne úshin resmı kómek kórsetip kele jatqanyn aıtyp ótken bolatyn.
«Biz nege shet memleketterdiń damýy úshin resmı kómek kórsetýimiz kerek degen máseleni jurt túsinýleri kerek. Óıtkeni, memlekettik bıýdjetten osyǵan qarajat bólinedi, al ondaı qarajatty ishki mańyzdy maqsattarǵa da jumsasaq bolady emes pe? Bul turǵydan alǵanda eń birinshi túıetinimiz syrtqy saıasat - bul qashanda ishki saıasattyń jalǵasy. Іshki saıasat bólek, syrtqysy bólek degen bolmaıdy», - dedi Máýlen Áshimbaev.
Onyń aıtýynsha, Qazaqstannyń qazirgi tańda syrtqy saıasatta júzege asyryp jatqanynyń barlyǵy - ishki ulttyq múddege saı keledi. Sonyń ishinde Aýǵanstan da bar. Osyǵan oraı, Májilis depýtaty «Nege biz Aýǵanstanǵa kómektesip kelemiz?» degen saýalǵa jan-jaqty toqtalyp ótti. Onyń aıtýynsha, Aýǵanstanǵa kómektiń uzaq jyldarǵa arnalǵan baǵdarlamasy 50 mln. dollardy quraıdy. Sonyń aıasynda myń aýǵan stýdentterin oqytýdy óz mindetimizge aldyq. Al bul ne úshin kerek?
«Bizge turaqty Aýǵanstan qajet. Aýǵanstandaǵy turaqtylyq - bul Ortalyq Azııaǵa, sonyń ishinde Qazaqstanǵa tóngen qaterdiń azaıǵanyn bildiredi. Bul - esirtki aǵynynyń, terrorızm men ekstremızmmen baılanysty qaýiptiń tómendegenin, bosqyndar problemasynyń azaıatynyn bildiredi. Sondyqtan da, biz Aýǵanstanda qashan turaqtylyq bolady dep qol qýsyryp otyrmaı, oǵan óz úlesimizdi qosýǵa tıispiz», - dedi ol.
Máýlen Áshimbaevtyń aıtýynsha, shet elderge resmı kómektiń ekinshi bir tıimdiligi - Qazaqstan úshin jaǵymdy ımıdj qalyptastyrady.
«Bul ásirese qandaı da bir halyqaralyq uıymdarda basshylyq organdarǵa ózimizdi usyný barysynda oń áser beredi. Máselen, biz BUU Qaýipsizdik Keńesiniń Turaqty emes músheligine ótinish berip, sonymen jumys istep jatyrmyz. Al oǵan saılanǵannan ne paıda? Árıne, munyń elimizdiń ishki jaǵdaıyna tıimdiligi orasan. Óıtkeni, Qazaqstan BUU Qaýipsizdik Keńesine múshelikke ótse, elimizdi búkil álem odan saıyn tanı túsedi, elimizdi BUU aıasynda tanyǵan saıyn senim de arta túsedi. Al senim artsa, ınvestıtsııanyń aǵylýyna da jol ashylady. Investıtsııa degenniń ózi ulttyq ekonomıkanyń qarqynyn údetedi. Qysqasha aıtqanda, syrtqy saıasatymyzdy ozdyrý arqyly biz ishki jaǵdaıymyzdy onan saıyn ornyqty etetin bolamyz», - dedi M. Áshimbaev.
