Qazaqstan Aýǵanstanǵa gýmanıtarlyq júk jiberdi
ASTANA. KAZINFORM — Qazaqstan Prezıdenti Qasym-Jomart Toqaevtyń tapsyrmasyna jáne Úkimet qaýlysyna sáıkes Aýǵanstan halqyna joıqyn jer silkinisinen zardap shekken turǵyndardy qoldaý maqsatynda gýmanıtarlyq kómek jóneltildi, dep habarlaıdy TJM baspasóz qyzmeti.
— Memlekettik materıaldyq rezervten qajetti dári-dármekter, medıtsınalyq quraldar, tósek-jabdyqtar, shatyrlar jáne ózge de birinshi kezektegi qajetti zattar bólindi. Sonymen qatar Qazaqstan Respýblıkasynyń Densaýlyq saqtaý mınıstrligi zardap shekkenderge bilikti kómek kórsetý úshin medıtsınalyq qyzmetkerler tobyn jasaqtap jóneltti. Gýmanıtarlyq júktiń quramyna jalpy salmaǵy 18 tonna bolatyn 34 ataý engizildi. Júk Qazaqstan Respýblıkasy Qorǵanys mınıstrliginiń ushaǵymen jetkizilip, gýmanıtarlyq kómek búgin aýǵan tarapyna tabystalady, — delingen habarlamada.
TJM áskerı bóliminiń qyzmetkerleri men áskerı qyzmetshileri tıeý jáne túsirý jumystaryn júrgizip, júktiń jedel daıyndalýy men jóneltilýin qamtamasyz etti.
Gýmanıtarlyq kómek «KazAID» Qazaqstandyq halyqaralyq damý agenttiginiń qoldaýymen kórsetildi.
Qazaqstan Respýblıkasy gýmanızm men ózara kómek qaǵıdattaryn basshylyqqa ala otyryp, Aýǵanstanǵa qoldaý kórsetýdi jalǵastyrady.
Budan buryn aýǵan tarapynyń bastamasymen Qazaqstan Respýblıkasynyń Syrtqy ister mınıstri Ermek Kósherbaev Aýǵanstan Syrtqy ister mınıstri Ámir Han Mýttakımen telefon arqyly sóılesti. Kósherbaev taıaýda bolǵan joıqyn jer silkinisterine baılanysty aýǵan halqyna kóńil aıtyp, aldaǵy ýaqytta Qazaqstan tarapynan Qabylǵa gýmanıtarlyq mıssııa jiberiletinin habarlady.