Qazaqstan Aýǵanstanǵa azyq-túlik jetkizetin negizgi elderdiń biri bolmaq

 ASTANA. QazAqparat - Elbasy Nursultan Nazarbaev BUU Qaýipsizdik Keńesi aıasynda Qazaqstannyń Aýǵanstan máselelerin sheshýge ekpin qoıyp otyrǵanyn málim etti, dep habarlaıdy QazAqparat tilshisi.

«Qazaqstan men Aýǵanstan arasyndaǵy baılanystar dostyq pen ózara túsinistik rýhynda ilgerilep keledi. Elimiz Aýǵanstandaǵy jaǵdaıdy turaqtandyrýǵa, ony áleýmettik-ekonomıkalyq turǵydan damytýǵa óz úlesin qosýda. BUU Qaýipsizdik Keńesiniń múshesi retinde Aýǵanstan máselelerin sheshýge atsalysyp kelemiz», - dedi Prezıdent Qazaqstanǵa jańadan taǵaıyndalǵan elshilerden senim gramotasyn qabyl alý saltanatty sharasynda.

Sonymen qatar Memleket basshysy Kabýlǵa jyl saıyn qarjylaı, tehnıkalyq, gýmanıtarlyq kómek kórsetilip jatqanyn eske saldy.

«Aýǵan jastaryna arnalǵan bilim berý baǵdarlamasy júzege asyrylýda. Sonymen qatar biz Kabýlǵa azyq-túlik taýarlaryn jetkizetin negizgi elderdiń biri bolýǵa ázirmiz», - dedi Nursultan Nazarbaev.
 

Budan buryn habarlanǵandaı, Memleket basshysyna Aýǵanstan Elshisi Mohammad Frahad Azımı, Qyrǵyzstan Elshisi Jeenbek Kýlýbaev, Lıtva Elshisi Gıntaýtas Vasıýlıs, Iran Elshisi Madjıd Samadzade Saber, Armenııa Elshisi Gagık Galachıan senim gramotasyn tabys etti.