Qazaqstan Aýǵanstanǵa 319 tonna gýmanıtarlyq kómek pen dárigerler tobyn jiberdi
ASTANA. KAZINFORM — Premer-mınıstrdiń orynbasary — ulttyq ekonomıka mınıstri Serik Jumanǵarın bastaǵan qazaqstandyq delegatsııa Kabýlǵa gýmanıtarlyq jáne iskerlik mıssııamen bardy, dep habarlaıdy Úkimettiń baspasóz qyzmeti.
Qazaqstan Aýǵanstan halqyna jalpy salmaǵy 318,8 tonna gýmanıtarlyq kómektiń kezekti partııasyn, sondaı-aq halyqqa medıtsınalyq kómek kórsetý úshin qazaqstandyq dárigerler tobyn jiberdi.
Delegatsııa quramyna Qazaqstannyń jetekshi medıtsınalyq uıymdarynan toǵyz maman kirdi. Aýǵanstandaǵy qazaqstandyq medıtsına kúnderi sheńberinde olar bir apta boıy keńes berip, halyqqa praktıkalyq medıtsınalyq kómek kórsetip, aýǵan áriptesteri úshin sheberlik synyptaryn ótkizedi.
Serik Jumanǵarın gýmanıtarlyq kómek Memleket basshysynyń tapsyrmasyna sáıkes, Qazaqstannyń Aýǵanstan halqyn qoldaýdaǵy dáıekti saıasatynyń bir bóligi ekenin atap ótti.
Gýmanıtarlyq júktiń jalpy salmaǵy — 318,8 tonna. Onyń quramyna 1,867 tonna dárilik preparattar (vırýsqa qarsy, gıpoglıkemııalyq, gastroenterologııalyq, júrek-qan tamyrlary, bronhodılatatorlar jáne basqa da preparattar) jáne medıtsınalyq buıymdar, 300 tonna qant, 100 oryndyq jazǵy shatyrlar, tósek-oryn jabdyqtaryn jáne basqa da qajetti zattar kiredi. Júktiń negizgi bóligi, 8 vagon, Balh provıntsııasyndaǵy Haıraton stansasyna temirjol arqyly, keıbir dári-dármekter delegatsııamen birge áýe kóligimen jetkizildi. Gýmanıtarlyq kómek jetkizýdi KazAID qazaqstandyq halyqaralyq damý agenttigi Qazaqstan Respýblıkasynyń Syrtqy ister, Tótenshe jaǵdaılar, Densaýlyq saqtaý jáne Kólik mınıstrlikterimen birlesip uıymdastyrdy.
— Biz Aýǵanstandy Ońtústik jáne Ortalyq Azııa aımaǵyndaǵy basty strategııalyq mańyzdy áriptesimizdiń biri retinde qarastyramyz. Turaqty jáne gúldengen Aýǵanstan búkil aımaqtyń beıbitshiligi men turaqtylyǵyn qamtamasyz etýde mańyzy zor ekenine senimdimiz. Elimiz jibergen gýmanıtarlyq kómektiń kezekti legi tek qoldaý kórsetý ǵana emes, sonymen qatar yntymaqtastyq, qurmet pen jaýapkershiliktiń aıqyn kórinisi. Búgin bizben birge qazaqstandyq medıtsınalyq uıymdardan jetekshi toǵyz maman — pedıatrlar, gastroenterologter, hırýrgtar, travmatologter jáne basqa da maman dárigerler keldi. Olar jergilikti turǵyndarǵa qajetti kómek kórsetip, aýǵan mamandary úshin sheberlik synyptaryn ótkizedi. Adamdardyń densaýlyǵy men ómirin saqtaýda dárigerler úshin naqty shekara joq. Osylaısha biz ótken jyly bastalǵan medıtsınalyq mıssııany jalǵastyrýdamyz, — dep atap ótti Serik Jumanǵarın.
Ortalyq Azııa men Aýǵanstan elderi úshin ornyqty damý maqsattary boıynsha BUU Aımaqtyq ortalyǵy halyqaralyq jáne aımaqtyq ózara is-qımyldy úılestirý úshin platforma bolady. 2026 jylǵy 17 maýsymda Qazaqstan Prezıdenti Almatyda Ortalyq qurý týraly zańǵa qol qoıdy. Aımaqtyq ortalyqtyń negizgi maqsaty — halyqaralyq uıymdarmen ózara is-qımyldy nyǵaıtý, turaqty damýdyń 17 maqsatyn júzege asyrý jónindegi halyqaralyq jáne óńirlik kúsh-jigerdi úılestirý, saýda-ekonomıkalyq baılanysty damytý jáne ınvestıtsııa tartý. Jalpy, Almatydaǵy BUU Ortalyǵy aýǵandyqtardyń qatysýymen Aýǵanstannyń turaqty damýynyń uzaqmerzimdi strategııasyn qalyptastyrý úshin halyqaralyq alań bola alady.
Aıta keteıik, BUU deregi boıynsha, búginde aýǵandyqtardyń 45 mln turǵynynan 30 mln-ǵa jýyǵy gýmanıtarlyq kómekke muqtaj. 5 jasqa deıingi 1,3 mln–ǵa jýyq bala durys tamaqtanbaý saldarynan emge zárý.
Qazaqstan — Ortalyq Azııa elderi arasyndaǵy Aýǵanstanǵa gýmanıtarlyq kómektiń iri jetkizýshisi. Bizdiń elimiz jıyrma jyldan astam ýaqyt boıy Aýǵanstanǵa 2021 jyldan bastap turaqty negizde gýmanıtarlyq kómek kórsetip keledi. Keıingi bes jylda elge ondaǵan myń tonna un men azyq-túlik, dári-dármekter men medıtsınalyq buıymdar, shatyrlar, turmystyq zattar, jyly kıimder jáne basqa da qajetti taýarlar jiberildi.
Qazaqstannyń Aýǵanstandaǵy alǵashqy gýmanıtarlyq mıssııasy 2025 jylǵy qarashada ótti. Sol kezde 13 qazaqstandyq dáriger on kún ishinde 44 ota jasap, júzden astam patsıentke medıtsınalyq kómek kórsetti.
Buǵan deıin Qazaqstan Aýǵanstan boıynsha halyqaralyq dıalogty nyǵaıtýǵa shaqyrǵanyn jazǵan edik.
