Qazaqstan Aýǵanstanǵa 272 tonna gýmanıtarlyq kómek jóneltti

ASTANA. KAZINFORM – QR Tótenshe jaǵdaılar mınıstrligi KazAID halyqaralyq damý agenttiginiń qoldaýymen Aýǵanstanǵa gýmanıtarlyq kómektiń iri partııasyn jiberdi.

Jalpy salmaǵy 272 tonna 728 kılogrammdy quraıtyn 26 vagon gýmanıtarlyq kómek temirjol arqyly Kabýl qalasyna jetkizildi.

Onyń ishinde shatyrlar, qant, kórpeler, et konservileri jáne un bar.

Aıta keteıik, bıyl sáýir aıynda da Qazaqstan Aýǵanstanǵa gýmanıtarlyq kómek jibergen bolatyn. Ol kezde dári-dármekter, medıtsınalyq buıymdar jáne jeke qorǵanys quraldary áýe arqyly jetkizilip, jalpy salmaǵy 3 tonna 396 kılogrammdy quraǵan edi.

- Qazaqstan tatý kórshilik qatynastardy nyǵaıtý baǵytyn ustanyp, óńirdegi gýmanıtarlyq turaqtylyqty qamtamasyz etýge ári qaraı da atsalysýǵa daıyn ekendigin málimdedi, - delingen aqparatta.