Qazaqstan Aýǵanstanǵa $21 mln-ǵa bıdaı men kúnbaǵys maıyn jetkizedi
ASTANA. KAZINFORM — Qazir Qazaqstan men Aýǵanstannyń saýdasy $581 mln-nan asty, dep habarlaıdy Saýda jáne ıntegratsııa mınıstrliginiń baspasóz qyzmeti.
Gerat qalasynda Qazaqstan men Aýǵanstan kásipkerleriniń qatysýymen bıznes-forým ótti. Qazaqstandyq bıznes-delegatsııany QR Saýda jáne ıntegratsııa vıtse-mınıstri Áset Núsipov basqardy. Forýmǵa Aýǵanstan naryǵyna shyǵýǵa jáne eki el arasyndaǵy yntymaqtastyqty keńeıtýge múddeli 12-ge jýyq qazaqstandyq kompanııa qatysty.
Forým barysynda eki eldiń kásipkerleri B2B formatynda kezdesip, ózara saýdany keńeıtý, qazaqstandyq ónim eksportyn arttyrý jáne birlesken jobalardy iske asyrý múmkindikterin talqylady.
— Kezdesýlerdiń qorytyndysy boıynsha qazaqstandyq WAYSTAR jáne Kim Rail International kompanııalary aýǵandyq OSMAN KHALID kompanııasymen bıdaı jetkizýge qatysty jalpy quny $11 mln bolatyn eki kelisimshartqa qol qoıdy. Sonymen qatar Qazaqstannyń Maıly daqyldardy óńdeýshiler ulttyq qaýymdastyǵynyń qatysýymen quny shamamen $10 mln bolatyn kúnbaǵys maıyn jetkizý týraly kelisim jasaldy, — delingen mınıstrlik taratqan aqparatta.
Sapar aıasynda «Haf–Gerat» temirjolynyń úshinshi ýchaskesiniń ashylý rásimi de ótti. Onyń qurylysyna qazaqstandyq «Integra Construction KZ» JShS qatysty.
Taraptar ózara saýdanyń basqa da baǵyttaryndaǵy yntymaqtastyqty jalǵastyrýǵa jáne eki eldiń bıznes ókilderi arasyndaǵy tikeleı baılanysty odan ári damytýǵa kelisti.
Qazaqstandyq delegatsııa Gerat provıntsııasyndaǵy ındýstrııalyq aımaqtyń óndiristik áleýetimen de tanysty. Іri kásiporyndardyń ókilderi mármár óndirý jáne óńdeý, metall prokatyn shyǵarý, farmatsevtıka jáne alkogolsiz sýsyndar óndirisindegi kásiporyndardyń jumysymen tanystyrdy.
Aıta keteıik, Qazaqstan men Aýǵanstan arasyndaǵy saýda kólemi de ósip keledi. 2026 jyldyń qańtar–shilde aılarynda eki el arasyndaǵy taýar aınalymy $581,1 mln boldy. Bul 2025 jyldyń búkil qorytyndysyndaǵy $541,6 mln kórsetkishten joǵary.
Qazaqstannyń Aýǵanstanǵa eksportynda un, bıdaı, kúnbaǵys maıy, metall ónimderi jáne mıneraldy tyńaıtqyshtar negizgi oryn alady. Saýda kóleminiń ósýine eki el kásipkerleri arasyndaǵy tikeleı iskerlik baılanystyń nyǵaıýy da yqpal etip otyr.
Qazaqstan eki el arasyndaǵy iskerlik baılanystardy damytý úshin turaqty túrde saýda-ekonomıkalyq mıssııalar, bıznes-forýmdar jáne B2B kezdesýler ótkizedi. Al Kabýl men Gerattaǵy Qazaqstannyń Saýda úıleri otandyq ónimderdi Aýǵanstan naryǵynda ilgeriletýge jáne qazaqstandyq kásipkerlerdiń aýǵandyq seriktestermen tikeleı baılanys ornatýyna múmkindik beredi.
Gerattaǵy bıznes-forým nátıjesinde jasalǵan kelisimder Qazaqstan men Aýǵanstan arasyndaǵy saýdany keńeıtip, qazaqstandyq ónim eksportyn arttyrýǵa jáne eki el kásipkerleri arasyndaǵy tikeleı baılanysty nyǵaıtýǵa jańa múmkindik beredi.
Osydan buryn elde sary maı men kúnbaǵys maıy óndirisiniń kólemi artqanyn jazǵanbyz.
