Qazaqstan Aýǵanstandaǵy jaǵdaıdy retteýdiń jańa qadamyn usynady
ASTANA. QazAqparat - BUU Qaýipsizdik Keńesinde Aýǵanstandaǵy jaǵdaı boıynsha ashyq pikirtalas ótti. Onda BUU Bas hatshysynyń Aýǵanstan máselesi jónindegi Arnaýly ókili - BUU Aýǵanstanǵa kómek jónindegi mıssııa basshysy T. ıAmamoto atalmysh eldegi ahýal boıynsha Bas hatshynyń baıandamasyn usyndy, dep habarlaıdy QazAqparat QR Syrtqy ister mınıstrliginiń baspasóz qyzmetine silteme jasap.
Jıynǵa Aýǵanstan Syrtqy ister mınıstri S. Rabbanı da qatysty.
Talqylaý barysynda sóz sóılegen Qazaqstannyń BUU-daǵy Turaqty ókili Qaırat Omarov Aýǵanstandaǵy qaýipsizdiktiń turaqtylyqqa keri áserin tıgizip otyrǵanyn aıtyp, jaǵdaıǵa alańdaýshylyq bildirdi. Ondaǵy ahýaldyń tutastaı óńirge yqpal etetinin atap ótti. Budan bólek, Aýǵanstannyń úlken áleýetke ıe tartymdy áriptes retindegi ımıdjin qalyptastyrýǵa Qazaqstan tarapy járdemdesýge umtylatyny, aýǵan halqy birlesken jobalardy júzege asyrýǵa muqtaj ekeni, jańa jumys oryndaryn qurýdyń ózektiligi aıtyldy. Sonymen qatar, Ortalyq Azııa memleketteriniń Aýǵanstanmen ınfraqurylym, tranzıt jáne kólik, energetıka jáne taǵy da basqa salalar boıynsha uzaqmerzimdi yntymaqtastyqqa múddeli ekendigi atalyp ótti.
«Qazaqstannyń Aýǵanstandaǵy jaǵdaıdy retteý jónindegi usynyp otyrǵan jańa qadamy qaýipsizdik pen damý máseleleriniń ózara baılanysyna negizdelgenine nazar aýdaryldy. Tutastaı alǵanda debatqa qatysýshylar halyqaralyq qaýymdastyqty aýǵan halqyna kómek kórsetýdi jalǵastyra berýge shaqyryp, ondaǵy beıbitshilik pen turaqtylyqqa qol jetkizýge úndedi», - delingen baspasóz baıanynda.
