Qazaqstan Aýǵanstan men Rýandanyń jer qoınaýyn zerttep jatyr

ASTANA. KAZINFORM – Qazaqstandyq «Taý-Ken Samuryq» kompanııasy Rýanda men Aýǵanstan aýmaqtarynda sırek jáne sırek jer metaldary boıynsha geologııalyq barlaý jumystaryn bastady. Bul týraly «Samuryq-Qazyna» AQ basqarma tóraǵasy Nurlan Jaqypov Aqorda kýlýarynda aıtty.

Qor basshysy «Taý-Ken Samuryq» kompanııasy sheteldik áriptesterine úlken qyzyǵýshylyq tanytyp otyrǵanyn, Rýanda men Aýǵanstanda naqty jumys júrgizilip jatqanyn atap ótti.

– Rýanda boıynsha biz olardyń memlekettik organymen birlesken qyzmet týraly tıisti kelisim ornatqanbyz. Qazirgi ýaqytta bes nysanaly aımaq anyqtaldy. Sol aımaqtarǵa shyǵý úshin bizge olardyń memlekettik kompanııasymen birlesken kásiporyn qurý qajet. Bizdiń tarap barlyq qujatty maquldap, rýandalyq taraptyń qaraýyna tapsyrdy, – dedi N.Jaqypov agenttik tilshisine bergen suhbatta.

Qazaqstan rýandalyq seriktester maquldaýyn jyl sońyna deıin kútedi. Osydan keıin birlesken kásiporyn paıdaly qazbalardy barlaýmen jáne óndirýmen aınalysa alady.

– Aýǵanstan boıynsha da jumys júrip jatyr. Onda eki ýchaskeden synama aldyq, olar jaqsy geologııalyq nátıje kórsetti. Munda ázirge óndirý týraly sóz joq, biz qazir yqtımal jergilikti seriktestermen lıtsenzııalar boıynsha ári qaraı qalaı ne isteý keregin talqylaý deńgeıindemiz, – dedi «Samuryq-Qazyna» basshysy.

Synamalar shilde aıynda alynǵan, zerthanalyq zertteýler qyrkúıekte júrgizilgen. Bul rette N.Jaqypov naqty qandaı paıdaly qazbalar tabylǵanyn aıtpady.

– Qazaqstan úshinshi elderden keletin shıkizatty tereń óńdeýdi damytady jáne sırek ári sırek jer materıaldaryn óndirý boıynsha óz óndiristik qýattaryn júkteýdi josparlap otyr, – dedi N.Jaqypov.

Eske sala ketsek, bıyl mamyr aıynda Rýanda Prezıdenti Pol Kagame Qazaqstanǵa resmı saparmen keldi. Onda Qazaqstan Rýandadan berılıı kontsentratyn satyp alatyny habarlanǵan edi.

Sondaı-aq, Qazaqstan Aýǵanstannan da berılıı ımporttaýy múmkin ekeni aıtyldy.