Qazaqstan Aýǵanstan qyzdaryn oqytý baǵdarlamasyn jalǵastyrýǵa daıyn – Smadııarov

ASTANA. QazAqparat – Qazaqstan Aýǵanstan qyzdaryna bilim berý baǵdarlamasyn jalǵastyrýǵa daıyn. Bul týraly QR Syrtqy ister mınıstrliginiń resmı ókili Aıbek Smadııarov málim etti, dep habarlaıdy QazAqparat.

«Aýǵanstan bıliginiń qyz balalardy 6-synyptan keıin mektepte oqýǵa jáne áıelderge memlekettik mekemeler men halyqaralyq uıymdarda jumys isteýine ýaqytsha tyıym salǵany týraly aqparatty úlken alańdaýshylyqpen qabyldadyq. Áıelderdiń quqyǵyn qorǵaý men genderlik teńdikti ilgeriletý máselesi árdaıym Úkimettiń nazarynda. Bul másele bizdiń eldiń BUU Adam quqyqtary jónindegi keńesine músheligimizde 2022-2024 jylǵy basymdyqtarynyń biri bolyp sanalady», - dedi Aıbek Smadııarov mınıstrliktiń aptalyq brıfınginde.

Onyń aıtýynsha, elimiz Aýǵanstandy qalpyna keltirý úshin qarjylyq, tehnıkalyq jáne gýmanıtarlyq kómekti júzege asyrý boıynsha óńirlik jáne halyqaralyq bastamalar sheńberinde ártúrli baǵdarlamalarǵa belsendi qatysyp otyrady.

Atap aıtqanda, 2017 jyly Qazaqstan Aýǵanstandaǵy áıel azamatshalar úshin oqytý baǵdarlamasyn júzege asyrý týraly bastama kótergen bolatyn. Bul Eýropalyq odaqtyń qoldaýyn taýyp, 2022 jylǵa deıin iske asyrylyp keldi.

«Ázirge bul bastama toqtap tur. Aýǵanstan úkimetiniń kelisimi bolǵan jaǵdaıda biz bul baǵdarlamany jalǵastyrýǵa daıynbyz. Bul máseleni talqylap otyramyz, endi aýǵan tarapynyń jaýabyn kútemiz», - dedi Aıbek Smadııarov.