Qazaqstan-Aýǵanstan: eki eldiń bıznesmenderi yntymaqtastyq jóninde kelisti
ASTANA. QazAqparat - Búgin Astanada QR Investıtsııalar jáne damý mınıstrliginiń qoldaýymen Aýǵanstannyń Ónerkásip jáne saýda mınıstri Hýmaıýn Rasav bastaǵan aýǵandyq bıznesmenderdiń iri delegatsııasynyń qatysýymen kezdesý ótti, dep habarlaıdy QazAqparat primeminister.kz-ke silteme jasap.
Sharaǵa Aýǵanstan men Qazaqstannyń bıznes ortalarynyń 40-tan astam ókilderi, sondaı-aq Kazakh Invest, Kazakh Export, «QTJ», «Qazgeologııa» sekildi QR ulttyq kompanııalarynyń basshylyǵy jáne Qazaqstannyń Syrtqy saýda palatasynyń ókilderi qatysty.
Sapar aıasynda QR ınvestıtsııalar men damý vıtse-mınıstri Arystan Qabykenov aýǵan delegatsııasymen kezdesti, sondaı-aq qazaqstandyq jáne aýǵan bıznes ókilderiniń arasynda B2B kezdesýleri ótti.
Sapar barysynda taraptar túrli salalardaǵy, atap aıtqanda saýda-sattyq jáne ınvestıtsııalar, aýyl sharýashylyǵy, jer jáne áýe kóligi, sondaı-aq geologııa jáne mıneraldy resýrstar salalaryndaǵy Qazaqstan-Aýǵanstan qatynastarynyń qazirgi jaǵdaıy men damý keleshegin talqylady.
Sonymen qatar, Qazaqstannyń Syrtqy saýda palatasynyń alańynda aýyl sharýashylyǵy, kólik jáne logıstıka sekildi salalardaǵy Qazaqstannyń shaǵyn jáne orta bıznes ókilderimen kezdesýler uıymdastyryldy.
Aıta ketý kerek, atalǵan shara eki eldiń memlekettik sektor ókilderi men bıznes ókilderiniń qyzyǵýshylyǵyn týdyrdy. Osylaısha, saýda-ekonomıkalyq qatynastardyń negizgi taqyryptary talqylandy.
Shara qorytyndysy boıynsha delegatsııalardyń basshylary Konferentsııanyń kelisilgen hattamasyna qol qoıdy.
Qazaqstan men Aýǵanstan arasyndaǵy taýar aınalymy 2018 jyldyń qańtar-sáýir aılarynda $180,2 mln qurady, bul ótken jyldyń sáıkes kezeńimen salystyrǵanda 19,3%-ǵa joǵary ($151,1 mln).
2005 jyldan bastap 2018 jyldyń І toqsany kezeńinde Aýǵanstannan Qazaqstanǵa tikeleı ınvestıtsııalardyń jalpy aǵyny $0,2 mln qurady. 2005 jyldan bastap 2018 jyldyń І toqsany aralyǵynda Qazaqstannan Aýǵanstanǵa tikeleı ınvestıtsııalardyń jalpy aǵymy $0,3 mln qurady. Birlesken kásiporyndar: 2018 jyldyń 1 maýsymyndaǵy jaǵdaı boıynsha Qazaqstanda aýǵandyq qatysýmen 272 zańdy tulǵa, bólimsheler men ókildikter tirkelgen, onyń ishinde qyzmet istep turǵany - 119.
