Qazaqstan Aýǵanstan boıynsha UQShU jumys tobynyń otyrysyna qatysty

NUR-SULTAN. QazAqparat - Qazaqstan Syrtqy ister mınıstrliginiń Erekshe tapsyrmalar jónindegi Elshisi Talǵat Qalıev UQShU Syrtqy ister mınıstrleri keńesi janyndaǵy Aýǵanstan jónindegi jumys tobynyń kezekti otyrysyna qatysty, dep habarlaıdy QazAqparat.

Kezdesýge UQShU-ǵa múshe memleketterdiń, sondaı-aq BUU-nyń Ortalyq Azııa úshin preventıvti dıplomatııa jónindegi óńirlik ortalyǵynyń, TMD Terrorızmge qarsy kúres ortalyǵynyń, TMD Shekara áskerleri qolbasshylary keńesiniń úılestirý qyzmeti, ShYU Aımaqtyq terrorızmge qarsy qurylymy jáne Halyqaralyq Qyzyl krest komıtetiniń ókilderi qatysty.

«Qatysýshylar Aýǵanstan tóńiregindegi jaǵdaıdyń ózekti máseleri boıynsha pikir almasyp, aýǵan baǵyty boıynsha belsendi ózara is-qımylǵa jáne birlesken tásilderdi ázirleýge ortaq beıildiligin rastady.

Elshi T. Qalıev óz sózinde óńirlik qaýipsizdikti qamtamasyz etý maqsatynda Aýǵanstandaǵy jaǵdaıdy turaqtandyrý jónindegi halyqaralyq kúsh-jigirge qosqan Qazaqstannyń eleýli úlesin atap ótti», - delingen QR SІM habarlamasynda.