Qazaqstan Aýǵanstan boıynsha halyqaralyq dıalogty nyǵaıtýǵa shaqyrdy
ALMATY. KAZINFORM - Almatyda Aýǵanstan máseleleri boıynsha Eýropalyq Odaq pen Ortalyq Azııa memleketteriniń Arnaıy ókilderi men ýákilderiniń 8-inshi kezdesýi ótti, dep habarlaıdy QR Syrtqy ister mınıstrliginiń baspasóz qyzmeti.
Kezdesý barysynda qatysýshylar Aýǵanstandaǵy ahýaldyń qazirgi jaı-kúıine, onyń óńirlik qaýipsizdik pen turaqtylyqqa áserine, sondaı-aq Aýǵanstannyń ornyqty áleýmettik-ekonomıkalyq damýyna járdemdesý maqsatyndaǵy halyqaralyq yntymaqtastyqtyń keleshegine qatysty jan-jaqty pikir almasty.
Taraptar óńirlik ózara baılanystardy nyǵaıtý máselelerin, onyń ishinde Aýǵanstan aýmaǵy arqyly ótetin kólik-logıstıkalyq jáne tranzıttik dálizderdi damytý perspektıvalaryn talqylady.
Mundaı bastamalar Ortalyq jáne Ońtústik Azııa arasyndaǵy kólik-kommýnıkatsııalyq, saýda-ekonomıkalyq yntymaqtastyqty keńeıtýge, sondaı-aq Eýropalyq keńistigindegi baılanystardy nyǵaıtýǵa yqpal etetinine nazar aýdaryldy.
Kezdesý barysynda Qazaqstan Respýblıkasynyń óńirlik syn-qaterlerdi sheshýde saıası-dıplomatııalyq tetikterdi nyǵaıtýǵa, tatý kórshilik, senim jáne yntymaqtastyq qaǵıdattaryn ilgeriletýge baǵyttalǵan dáıekti ustanymy erekshe atalyp ótti.
Qazaqstan Respýblıkasynyń Prezıdenti Qasym-Jomart Toqaev júrgizip otyrǵan syrtqy saıası baǵdarǵa sáıkes, elimiz Ortalyq Azııadaǵy óńirlik kooperatsııany damytýǵa, tepe-teńdik qaǵıdattaryn ilgeriletý jáne halyqaralyq qatynastardaǵy Birikken Ulttar Uıymynyń úılestirýshi rólin kúsheıtýge aıryqsha mán beredi.
Qatysýshylar Qazaqstannyń Aýǵanstan máselesi boıynsha ózara halyqaralyq dıalogty damytýdaǵy, aýǵan halqyna gýmanıtarlyq kómek kórsetýdegi, bilim berý baǵdarlamalaryn júzege asyrýdaǵy jáne óńirlik ekonomıkalyq yqpaldastyqty ilgeriletýdegi úlesin joǵary baǵalady.
BUU-nyń Aýǵanstandy qoldaýǵa baǵyttalǵan halyqaralyq kúsh-jigerdi úılestirýdegi mańyzdy róline erekshe nazar aýdaryldy. Almaty qalasynda ornalasqan Ortalyq Azııa men Aýǵanstanǵa arnalǵan BUU Turaqty damý maqsattary jónindegi Óńirlik ortalyǵynyń qyzmeti joǵary baǵalanyp, onyń qurylýy Qazaqstan Prezıdentiniń BUU alańdarynda kótergen halyqaralyq yntymaqtastyqty nyǵaıtýǵa jáne óńirdiń ornyqty damýyna baǵyttalǵan bastamalarynyń naqty nátıjesi ekendigi atalyp ótti.
Pikirtalas barysynda Almaty qalasynyń kópjaqty dıplomatııanyń, óńiraralyq ózara is-qımyldyń jáne qaýipsizdik, ornyqty damý men gýmanıtarlyq yntymaqtastyq máseleleri boıynsha kelisilgen ustanymdardy qalyptastyrýdyń mańyzdy halyqaralyq ortalyǵy retindegi róliniń artyp kele jatqany aıtyldy.
Kezdesý qorytyndysy boıynsha qatysýshylar Ortalyq Azııa memleketteri, Eýropalyq Odaq jáne Birikken Ulttar Uıymy qurylymdary arasyndaǵy yntymaqtastyqty odan ári nyǵaıtýǵa, Aýǵanstandaǵy beıbitshilik pen turaqtylyqty qamtamasyz etýge, ornyqty damýdy qoldaýǵa, sondaı-aq búkil óńirdiń qaýipsizdigi men órkendeýine járdemdesýge beıildiligin rastady.
Qazaqstan Respýblıkasy Birikken Ulttar Uıymynyń qamqorlyǵymen halyqaralyq ózara is-qımyl tetikterin nyǵaıtýǵa, óńirlik yntymaqtastyqty damytýǵa jáne syndarly dıplomatııany ilgeriletýge baǵyttalǵan kúsh-jigerin aldaǵy ýaqytta da jalǵastyra beredi. Bul qyzmet beıbitshilik, ózara qurmet jáne ortaq jaýapkershilik qaǵıdattaryna negizdeledi.
Іs-sharaǵa Qazaqstan Respýblıkasynyń, Qyrǵyz Respýblıkasynyń, Tájikstan Respýblıkasynyń, Túrikmenstan, Ózbekstan Respýblıkasynyń Eýropalyq Odaqtyń jáne Birikken Ulttar Uıymynyń ókilderi qatysty.
Aıta keteıik, osyǵan deıin Májiliste Qazaqstan Úkimeti men BUU arasyndaǵy Almaty qalasynda Ornyqty damý maqsattary jónindegi óńirlik ortalyqty qurý týraly kelisimdi ratıfıkatsııalaý máselesi qaralǵan bolatyn.
