Qazaqstan-Aýǵanstan bilim berý jáne ǵylymı-zertteý ortalyǵy qurylady
ASTANA. KAZINFORM – Kabýlda sý resýrstaryn basqarý salasyndaǵy alǵashqy Qazaqstan-Aýǵanstan bilim berý jáne ǵylymı-zertteý ortalyǵy qurylady. Bul týraly Úkimettiń baspasóz qyzmeti habarlady.
Qazaq ulttyq sý sharýashylyǵy jáne ırrıgatsııa ýnıversıteti, Qazaq ulttyq agrarlyq zertteý ýnıversıteti jáne Kabýl ýnıversıteti arasynda sý resýrstaryn basqarý men ırrıgatsııa, klımattyń ózgerýi jaǵdaıynda aýyl sharýashylyǵyn ornyqty damytý salasyndaǵy yntymaqtastyq boıynsha nıettestik týraly tıisti kelisim jasaldy. Qujatqa vıtse-premer - ulttyq ekonomıka mınıstri Serik Jumanǵarın bastaǵan qazaqstandyq delegatsııanyń Aýǵanstanǵa sapary sheńberinde qol qoıyldy.
Ortalyqty Kabýl ýnıversıtetiniń bazasynda qurý josparlanǵan. Bul – sý resýrstary, ırrıgatsııa, ornyqty aýyl sharýashylyǵy salasyndaǵy alǵashqy oqý-zertteý mekemesi. Jańa ortalyq maman daıarlaý, bilim almasý, birlesken zertteý júrgizý men sý-agrarlyq sektorda zamanaýı sheshimder engizýdiń tájirıbe alańyna aınalady. Qazaqstandyq ǵalymdar men sarapshylar bilim berý baǵdarlamalary men ǵylymı súıemeldeý júrgizedi.
Qazaqstan-Aýǵanstan bıznes-forýmynda sóz sóılegen Serik Jumanǵarın sý dıplomatııasy, sý resýrsyn utymdy paıdalaný men osy saladaǵy aımaqtyq yntymaqtastyqty nyǵaıtý máselesine Qazaqstan erekshe nazar aýdaratynyn atap ótti.
Ortalyq sý qaýipsizdigi, ornyqty aýyl sharýashylyǵy, klımattyq beıimdelý, ekologııalyq monıtorıng pen azyq-túlik qaýipsizdigi baǵytyn biriktiretin ýnıversıtetaralyq zertteý platformasy retinde damıdy degen boljam bar. Keshendi tásil aımaqtyń ornyqty damýy úshin tájirıbelik sheshimder ázirleýge múmkindik beredi.
Kabýl ýnıversıteti – Aýǵanstandaǵy 1932 jyly qurylǵan eń kóne, eń iri memlekettik joǵary oqý orny. Ýnıversıtette 22 fakýltet, pánaralyq yntymaqtastyqqa arnalǵan aýqymdy akademııalyq baza bar.
Aıta ketelik Qazaqstan Respýblıkasy Premer-mınıstriniń orynbasary — ulttyq ekonomıka mınıstri Serik Jumanǵarın Kabýlǵa resmı sapary sheńberinde Aýǵanstannyń ishki ister mınıstri Sıradjýddın Hakkanımen kezdesý ótkizgen edi.
