Qazaqstan Aýǵanstan áıelderine kómek kórsetetin keńse ashýdy usyndy
Bul týraly QR Parlamenti Senatynyń depýtaty Darıǵa Nazarbaeva Astanada ótip jatqan «Aýǵanstandaǵy áıelderdiń quqyqtary men múmkindikterin keńeıtý» óńirlik konferentsııasynda málimdedi.
Óz sózinde senator Aýǵanstandaǵy beıbitshilik pen turaqtylyqtyń tutas Ortalyq Azııa amaǵy úshin mańyzdy ekenin atap ótti.
«Aýǵanstandaǵy áıelderdiń jaǵdaıy qıyn. Búgin Aýǵanstanda 7-9 jastaǵy qyzdardy turmysqa shyǵaratynyn, olardyń 65 protsenti bosaný kezinde qaıtys bolatynyn estidik. Bul óte kúrdeli jaǵdaı. Aýǵanstanǵa BUU, Eýroodaq, bankter neshe túrli halyqaralyq uıymdar birtalaı járdem kórsetip jatyr. Biraq, sonyń barlyǵyn retteıtin, baqylaıtyn bir ortalyq joq», - dedi Darıǵa Nazarbaeva jýrnalısterge bergen suhbatynda.
Onyń aıtýynsha, keńseniń ashylýy men onyń qaı qalada ornalasatyny áli sheshilgen joq.
«Bul ázirge bizdiń usynysymyz ǵana, kórshiles elderdiń kózqarasy qandaı ekenin bilý qajet, talqylaý qajet. Qazaqstandyq tarap bul másele boıynsha pikir almasýǵa árdaıym ashyq. Búgingi konferentsııa da birrettik shara bolyp qalmaýy kerek. Jyl saıyn ótkiziletin Ortalyq Azııadaǵy mańyzdy sharaǵa aınaldyryp, Aýǵanstandaǵy oń ózgeristerdi baqylaýymyz kerek», - dedi Darıǵa Nazarbaeva.
