Qazaqstan aýǵan kınologterin oqytýǵa jáne qyzmettik ıtter berýge daıyn
ASTANA. KAZINFORM – Qazaqstan Respýblıkasy Premer-mınıstriniń orynbasary — ulttyq ekonomıka mınıstri Serik Jumanǵarın Kabýlǵa resmı sapary sheńberinde Aýǵanstannyń ishki ister mınıstri Sıradjýddın Hakkanımen kezdesý ótkizdi. Bul týraly Úkimettiń baspasóz qyzmeti habarlady.
Aýǵanstannyń ishki ister mınıstri Qazaqstanǵa jáne Memleket basshysy Qasym-Jomart Toqaevqa aýǵan halqyna kórsetken qoldaýy úshin alǵysyn bildirdi. Ol aımaqtaǵy turaqtylyq pen qaýipsizdikti qamtamasyz etýde ózara senim men qurmettiń, syndarly is-qımyldyń mańyzdy ekenin atap ótti.
Serik Jumanǵarın de óz tarapynan Aýǵanstan Qazaqstannyń Ortalyq jáne Ońtústik Azııadaǵy mańyzdy áriptesi ekenin jetkizdi. Qazirgi ýaqytta eki eldiń beıindi vedomstvolary esirtki bıznesi men ekstremızm sekildi transulttyq qylmysqa qarsy is-qımyl salasyndaǵy yntymaqtastyqty damytý máselesin pysyqtalyp jatyr. Qazaqstandyq tarap tikeleı baılanys ornatýda tıisti yntymaqtastyq týraly memorandým jasaýǵa daıyn ekendigin bildirdi. Vıtse-premerdiń aıtýynsha, qaýipsizdikti qamtamasyz etý saýda-ekonomıkalyq baılanysty keńeıtýdiń, ınvestıtsııa tartý men birlesken jobalardy júzege asyrýdyń negizgi faktorynyń biri.
Taraptar kınologııalyq qyzmet mamandaryn daıarlaý salasyndaǵy ózara is-qımylǵa erekshe nazar aýdardy. Serik Jumanǵarın buǵan deıin aýǵan tarapy eki eldiń esirtkige qarsy bólimsheleri arasynda tájirıbe almasý jóninde bastama kótergenin eske saldy. Osyǵan baılanysty Qazaqstan ІІM Almatydaǵy ІІM Kınologııalyq ortalyǵynyń bazasynda aýǵan kınologtaryn oqytýdy uıymdastyrýǵa daıyn. Qazaqstan bıyl bes maman daıarlap shyǵarsa, kelesi jyly aýǵan tarapyna bes qyzmettik ıt berýdi usynyp otyr.
Kezdesý barysynda Aýǵanstannyń ishki ister mınıstrliginiń qaramaǵyndaǵy Mazarı-Sharıftegi azot óndirý zaýytyn jańǵyrtýǵa qazaqstandyq mamandardyń qatysýy talqylandy. Qazaqstandyq ınjenerler kásiporynǵa barǵan bolatyn. Kelesi kezeńde nysanǵa tehnıkalyq tekserý júrgiziledi. Jabdyqty jańǵyrtý qajettiligi anyqtalyp, jumys quny baǵalanady. Qazaqstandyq kásiporyndar óndiristi tehnologııalyq jańartý, ınjınırıng, jabdyq jetkizý men iske qosý, jóndeý jumysyn súıemeldeý salasynda qajetti quzyretke ıe. Osyǵan baılanysty taraptar jobany qarjylandyrý, mindettemeni oryndaý kepildigi, sondaı-aq logıstıkany, mamandardyń óndiristik alańǵa qol jetkizýi máselesin talqylady.
Kelissózder qorytyndysy boıynsha taraptar yntymaqtastyqty odan ári damytýǵa ózara múddeli ekenderin rastap, qaýipsizdik kepildigi, senimdi logıstıkalyq qatynas, quqyq qorǵaý organdarymen jedel ózara is-qımyl uzaqmerzimdi ekonomıkalyq jáne ınvestıtsııalyq jobalardy júzege asyrý úshin qajetti jaǵdaı ekenin atap ótti.
Aıta ketelik Qazaqstan Aýǵanstanmen saýda, kólik jáne ónerkásip salalaryndaǵy áriptestikti keńeıtetini týraly jazǵan edik.
