Qazaqstan aýǵan halqyna gýmanıtarlyq kómek kórsetýdi jalǵastyra beredi – Qaýipsizdik Keńesiniń Hatshysy
Dýshanbe qalasynda Aýǵanstan máseleleri boıynsha óńirlik qaýipsizdik dıalogynyń IV otyrysy ótti. Atalǵan jıynǵa Qytaı, Reseı Federatsııasy, Úndistan, Pákistan, Iran, Ózbekstan, Tájikstan, Qyrǵyzstan jáne Túrikmenstan elderiniń qaýipsizdik keńesiniń hatshylary men ulttyq qaýipsizdik jónindegi keńesshileri qatysty.
Qazaqstan delegatsııasyn Prezıdenttiń kómekshisi – Qaýipsizdik Keńesiniń Hatshysy Ǵızat Nurdáýletov bastap bardy. Ol óz sózinde búkil óńirdiń múddesi úshin eldegi jaǵdaıdy ózgertýdiń kilti sanalatyn baǵyttardy, sonyń ishinde halyqaralyq terrorızm men ekstremızm qaterleriniń eksportyna jol bermeý, esirtki bıznesine qarsy is-qımyl, azyq-túlik qaýipsizdigin qamtamasyz etý jáne gýmanıtarlyq daǵdarysty eńserý jóninde baıandap berdi.
Búkil óńirdegi kólik qatynastaryn jandandyrý qajettigi jáne Aýǵanstandy áleýmettik-ekonomıkalyq turǵydan qalpyna keltirý maqsatynda bilim berý júıesin damytý máselesi ekonomıkalyq qaýipsizdiktiń negizgi faktory retinde atap ótildi.
Qazaqstan aýǵan halqyna gýmanıtarlyq kómek kórsetýdi jalǵastyra beredi, azyq-túlik, dári-dármek, eń aldymen, qajetti basqa da taýarlar jetkizýdi júzege asyrady, sondaı-aq aýǵan stýdentterin oqytýǵa múmkindikter beriledi.
Sonymen qatar jıynda Aýǵanstan máselesiniń barlyq spektri boıynsha úılestirilgen kúsh-jigerdiń mańyzdylyǵy aıtyldy.
Otyrys qorytyndysy boıynsha qorytyndy málimdeme qabyldandy. Onda halyqaralyq terrorıstik uıymdardyń Aýǵanstan aýmaǵyn aımaqtaǵy elderge qarsy kez kelgen terrorıstik aktilerdi jasyrý, oqytý, josparlaý nemese qarjylandyrý úshin paıdalanylýǵa jol berilmeıtini atap ótildi.
Dıalogqa qatysýshylar shekara mańy memleketteri men basqa da múddeli elder arasynda destrýktıvti toptardyń qyzmetine baılanysty ahýal týraly jedel aqparat almasý jónindegi yntymaqtastyqty jolǵa qoıýǵa nıetti ekenin rastady.
Budan bólek memleketterdiń aýǵan halqyna gýmanıtarlyq kómek kórsetýge kedergisiz qol jetkizýdi qamtamasyz etýge degen umtylysy atap ótildi.
Іs-shara barysynda Ǵızat Nurdáýletov Reseı Federatsııasy Qaýipsizdik Keńesiniń Hatshysy Nıkolaı Patrýshevpen, Tájikstan Respýblıkasy Qaýipsizdik Keńesiniń Hatshysy Nasrýlla Mahmýdzodamen jáne Qyrǵyz Respýblıkasy Qaýipsizdik Keńesiniń Hatshysy Marat Imanqulovpen ekijaqty kezdesýler ótkizdi.
Jıynǵa qatysýshylar óńirlik jáne jahandyq qaýipsizdiktiń negizgi máseleleri men osy baǵyttaǵy yntymaqtastyqtyń negizgi baǵyttary boıynsha pikir almasty.
