Qazaqstan aýǵan halqyna gýmanıtarlyq kómek kórsetý boıynsha josparyn tolyq oryndaıdy

ASTANA. QazAqparat – Qazaqstan aýǵan halqyna gýmanıtarlyq kómek kórsetý boıynsha alǵan ulttyq mindettemelerin tolyq júzege asyrady. Bul týraly elordada ótken baspasóz máslıhatynda Syrtqy ister mınıstrliginiń resmı ókili Aıbek Smadııarov málim etti, dep habarlaıdy QazAqparat tilshisi.

«2023 jylǵy 19-20 qańtarda Brıýssel qalasynda Ortalyq Azııa memleketteriniń jáne Eýropa odaǵynyń Aýǵanstan boıynsha arnaıy ókilderiniń úshinshi otyrysy ótti. Oǵan qatysqandaróńirlik qaýipsizdik syn-qaterlerine sholý jasaý jáne aýǵan halqyna úzdiksiz kómek kórsetý boıynsha elderdiń yntymaqtastyǵyn talqylady», - dedi A. Smadııarov.

Osy oraıda ol Aýǵanstandaǵy turaqty beıbitshilik pen ornyqty damýǵa jan-jaqty qoldaý kórsetýge qatysty ýaǵdalastyq bolǵanyn aıtty. Sonymen qatar, jıyn barysynda Aýǵanstandaǵy áıelder men qyz balalardyń quqyqtaryn qorǵaý jaǵdaıynyń nasharlaýyna baılanysty másele kóterilgen.

«Qazaqstandyq delegatsııany Syrtqy ister mınıstrliginiń Erekshe tapsyrmalar jónindegi elshisi Talǵat Qalıev bastap bardy. Otyrysta sóılegen sózinde ol Qazaqstannyń aýǵan halqyna gýmanıtarlyq kómek kórsetý boıynsha alǵan ulttyq mindettemelerin tolyq júzege asyratynyn habarlady. Bul turǵyda qazaqstandyq agrarlyq kásiporyndardyń BUU-nyń Dúnıejúzilik azyq-túlik baǵdarlamasymen ózara is-qımyly atap ótildi. Máselen, osy ispettes yntymaqtastyq aıasynda 2022 jyldyń birinshi jartysynda Aýǵanstanǵa 456 myń tonna qazaqstandyq un jetkizilgen», - dedi resmı ókil.

«Otandyq joǵary oqý oryndarynyń Eýro odaǵy qarjylandyratyn jáne Birikken Ulttar Uıymynyń Damý baǵdarlamasy iske asyratyn Qazaqstanda, Qyrǵyzstanda jáne Ózbekstanda aýǵan stýdentterine arnalǵan bilim berý baǵdarlamasyna belsendi qatysýyn jalǵastyratyny rastaldy. Іs-shara qorytyndysy boıynsha birlesken málimdeme qabyldandy», - dedi A. Smadııarov.

Budan buryn habarlanǵandaı, Aýǵanstannyń stýdent qyzdaryn Qazaqstanda oqytý máselesi pysyqtalyp jatyr.