Qazaqstan áýejaılarynyń saýda qyzmetterindegi qymbat baǵa problemasy qalaı sheshiledi

NUR-SULTAN. QazAqparat - QR Ulttyq ekonomıka mınıstrligi Básekelestikti qorǵaý jáne damytý komıtetiniń tóraǵasy Rústem Ahmetov Qazaqstan áýejaılaryndaǵy qoǵamdyq tamaqtaný jáne ózge de qyzmetterdegi baǵa qymbattyǵy problemasy qalaı sheshiletindigin aıtty, dep habarlaıdy QazAqparat tilshisi.

«Áýejaılardyń aýmaǵyndaǵy qoǵamdyq tamaqtaný, saýda qyzmetterindegi joǵary baǵa problemasynyń bar ekendigin bárimiz de bilemiz», - dedi komıtet basshysy Májiliste bıznes ahýaldy jaqsartýǵa baǵyttalǵan zań jobasyn tanystyrýǵa arnalǵan otyrysta.

Onyń atap ótýinshe, Básekelestikti qorǵaý jáne damytý komıteti bul baǵytta birneshe márte tekserý júrgizgen bolatyn. Alaıda, áli kúnge deıin jaǵdaı jaqsarmaı otyr.

«Halyqaralyq tájirıbege sáıkes, áýejaı aýmaǵyna kirý erejesin engizip, atalǵan jetkizýshilerdi irikteýdiń konkýrstyq tártibin anyqtaý, jetkizýshilerdiń sanyn barynsha azaıtý jáne negizgi kelisimshart qarym-qatynasyn jolǵa qoıý qajet. Bul áýejaı ákimshiligine jáne bizge olardyń aýmaqtaryna kirýdi baqylaýǵa jáne básekelestikti arttyrýǵa múmkindik beredi», - dedi Rústem Ahmetov.

Komıtet basshysynyń aıtýynsha, ereje buzǵandarǵa ákimshilik jaýapkershilik kózdeletin bolady.

Aıta keteıik, QR Ulttyq ekonomıka vıtse-mınıstr Jasulan Mádıev búgin Májilis depýtattaryna «Qazaqstan Respýblıkasynyń keıbir zańnamalyq aktilerine bıznes ahýaldy jaqsartý máseleleri boıynsha ózgerister men tolyqtyrýlar engizý týraly» zańynyń jobasyn tanystyrǵan bolatyn. Atalǵan zań jobasynda áýejaıdiń negizgi qyzmetine jatpaıtyn áýejaılar aýmaǵyndaǵy qyzmetter kórsetýge qol jetkizý qaǵıdalaryn bekitý kózdelgen.