Qazaqstan áýejaılarynyń ınfraqurylymyn damytýǵa 100 mlrd teńge ınvestıtsııa salynady
ASTANA. QazAqparat - 2015-2017 jyldar aralyǵynda Qazaqstannyń birqatar áýejaılarynyń ınfraqurylymyna shamamen 99 mlrd. teńge kóleminde ınvestıtsııalar salynady. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıng barysynda «Airoport Management Group» JShS Bas dırektory Klod Banan málimdedi.
«Memleket basshysynyń «Nurly jol» Joldaýynda áýejaılardy damytýǵa zor kóńil bólingen. Osyǵan baılanysty, 2015-2017 jyldar aralyǵynda Astana, Qyzylorda, Petropavl, Qostanaı áýejaılarynyń ınfraqurylymyn damytyp, ushyp-qoný alańdaryn, jolaýshylar termınalyn jańǵyrtý boıynsha iri jobalar júzege asyrylady. Astanadaǵy halyqaralyq áýejaıda jańa jolaýshylar termınaly salynady. Al eskisi ishki reısterge arnalatyn bolady. Sonymen qatar, Shymkent áýejaıynyń da jańa jobasy bastaldy», - dep atap ótti ol.
Onyń aıtýynsha, Petropavl men Qostanaı áýejaılarynda da osyndaı jumystar júrgizý josparlanǵan. «Onda jolaýshylar termınaly jóndeýden ótkizilip, ushyp-qoný jolaqtary jańǵyrtylady. Atalǵan áýejaılardyń ınfraqurylymyna salynatyn ınvestıtsııalardyń jalpy quny 99 mlrd teńge bolady», - deıdi kompanııa basshysy. Aıta keteıik, AMG kompanııasy qazaqstandyq áýejaılardy ońtaılandyrý maqsatynda jáne ǵalamdyq ındýstrııalandyrýǵa qatysý úshin áýe aktıvterin basqarý maqsatynda qyzmet etedi. Búginde Qazaqstannyń 6 áýejaıynyń aktsııalar paketi osy kompanııaǵa basqarýǵa berilgen. Basqarýshy kompanııa qolyna barlyǵy 11 áýejaıdy shoǵyrlandyrýdy josparlap otyr.
