Qazaqstan áýejaılaryna kelgen jolaýshylarǵa betperde taratylýy múmkin

NUR-SULTAN. QazAqparat – QR Densaýlyq saqtaý mınıstrligi 5 mln medıtsınalyq betperde satyp alyp, rezerv qurdy, dep habarlaıdy QazAqparat.

Bul týraly QR Densaýlyq saqtaý mınıstri Eljan Birtanov aıtyp berdi.

«Qazaqstan áýejaılaryna kelgen jolaýshylarǵa betperde taratý qajet degen ótinishter kelip tústi. Shet elderden kelgen otandastarymyzǵa kómektesý úshin bul usynysty qarastyryp jatyrmyz. Sonymen birge, maskalar týraly da aıtqym keledi. Orta eseppen jylyna eki mıllıonǵa jýyq maska tutynamyz. Al qazir qosymsha 5 mln betperde satyp alyp, rezerv qurdyq. Bizdiń oıymyzsha, bul jetkilikti. Oǵan qosa, rezervtik maqsatta otandyq jáne sheteldik óndirýshilermen kelissózder júrgizýdemiz», - dedi Eljan Birtanov.

Sonymen birge, mınıstr betperde baǵasynyń qymbattaýy jóninde pikir bildirdi.

«Betperde, dári jáne ózge de medıtsınalyq buıymdardyń qymbattap ketpeýi úshin jergilikti atqarý organdaryna dárihana basshylarymen jumys júrgizýdi tapsyramyz. Túsinistik tanytyp, qosymsha óndiristi uıymdastyrǵan otandyq taýar óndirýshilerge de alǵys bildiremiz» - dedi E. Birtanov.

Onyń aıtýynsha, ázirge dúnıe júzinde koronavırýs juqtyrǵan 7 711 naýqas tirkeldi, 170 naýqas kóz jumdy. Sonymen birge, jalpy 17 memlekette 90 naýqas tirkeldi.

Aıta keteıik, 6 qańtardan keıin Qytaıdan kelgen 54 qazaqstandyq qyzýy kóterilip, aýrýhanaǵa túsken. Onyń 16-sy emdelip shyqty.