Qazaqstan áýejaılaryndaǵy kommertsııalyq oryndar endi tek konkýrs arqyly beriledi
ASTANA. KAZINFORM — QR Joǵary aýdıtorlyq palatasynyń nusqamasy boıynsha áýejaılar aýmaǵynda kommertsııalyq qyzmetti júrgizý qaǵıdalaryna ózgerister engizildi. Kásipkerlerdiń jaldaý alańdaryna qoljetimdiligi endi biryńǵaı konkýrstyq sharttarmen retteledi. Bul týraly palatynyń baspasóz qyzmeti málim etti.
Qazaqstan áýejaılaryndaǵy kommertsııalyq alańdar Joǵary aýdıtorlyq palata aýdıtinen keıin konkýrstyq negizde ǵana beriletin bolady
Mundaı sharalarǵa qajettilik Astana qalasynda memlekettik resýrstardyń paıdalanylý tıimdiligine júrgizilgen aýdıt nátıjesinde anyqtaldy.
— Joǵary aýdıtorlyq palata tekserý qorytyndysy boıynsha Kólik mınıstrligine áýejaıdyń (áýeaılaq) aýmaǵynda áýejaı qyzmetine jatpaıtyn qyzmetter kórsetýge qol jetkizý qaǵıdalaryna ózgerister engizýdi tapsyrdy. Atap aıtqanda, qoǵamdyq tamaqtaný obektileri men azyq-túlik satý jáne bagajdy oraý avtomattary úshin jalǵa beriletin alańdardyń tek konkýrstyq negizde berilýin bekitýdi tapsyryldy, — delingen habarlamada.
Konkýrstyq irikteý barlyq jalǵa alýshy úshin teń jaǵdaı jasap, qyzmet kórsetýshilerdi negizsiz tańdaý táýekelderin azaıtady jáne áýejaılardyń múlkin paıdalaný tıimdiligin arttyrady. Sonymen qatar eń tıimdi usynystardy tańdaý áýejaılardyń jalǵa berýden túsetin menshikti kiristerin arttyrady.
Júrgizilgen aýdıt qorytyndysy boıynsha Joǵary aýdıtorlyq palatanyń basqa da tapsyrmalary men usynymdarynyń oryndalýy baqylaýda bolady.
Buǵan deıin Joǵary aýdıtorlyq palata kvazımemlekettik sektordyń bıýdjetke táýeldiligi kúsheıe túsetinin málimdedi.
