Qazaqstan áýejaılarynda jańa ereje kúshine enedi

ASTANA. KAZINFORM – Elimizdiń áýejaılarynda tekserý barysynda tárkilengen, tasymaldaýǵa tyıym salynǵan zattar endi saqtalmaıdy. Bul týraly QR Kólik mınıstrligi habarlady. 

Mınıstrlik málimetinshe, bul ózgeris halyqaralyq standarttarǵa sáıkestendirý jáne jolaýshylarǵa qyzmet kórsetý úderisterin ońtaılandyrý maqsatynda engizilip jatyr.

– Áýe kóligimen tasymaldaýǵa tyıym salynǵan zattardyń tizimimen aldyn ala tanysý usynylady. Tolyq aqparat áýekompanııalar men áýejaılardyń resmı saıttarynda, sondaı-aq tirkeý sórelerinde jáne tekserý beketterinde ornalastyrylǵan. Mysaly, qol júginde kólemi 100 mıllılıtrden asatyn suıyqtyqtar, aerozolder men gelderdi, sondaı-aq ózge de qaýipti zattardy alyp ótýge tyıym salynady, – delingen mınıstrlik habarlamasynda.

Avıatsııalyq qaýipsizdik talaptaryna sáıkes, zaýyttyq qaptamasy joq ónimderdi bal, tosap, sút ónimderi jáne úıde daıyndalǵan taǵamdardy áýe kemesine alyp kirýge bolmaıdy. Mundaı zattar tekserý kezinde tárkilenip, joıylady.

– Azamattyq áýe kemelerinde jolaýshylarǵa tasymaldaýǵa tyıym salynǵan qaýipti zattar men buıymdardyń tolyq tizimimen silteme arqyly tanysýǵa bolady, – dep habarlady vedomstvo.

Sondaı-aq Kólik mınıstrligi jolaýshylarǵa qaýipsizdik talaptaryna saı kelmeıtin zattardy ózderin shyǵaryp salýǵa kelgen adamdarǵa tapsyrýǵa bolatynyn eske saldy.

Jańa ereje 2025 jylǵy 27 tamyzdan bastap kúshine enedi.

Buǵan deıin, qazaqstandyqtar Reseıge jańa ereje boıynsha saparlaıtynyn jazǵanbyz.