Qazaqstan áýejaılarynda ushaqtardy qustardan qalaı qorǵaıdy
ASTANA. KAZINFORM – Qazaqstan áýejaılarynda ushaqtardyń qustarmen soqtyǵysýynyń aldyn alý úshin dybystyq, jaryqtyq, pırotehnıkalyq jáne lazerlik qurylǵylar qoldanylady. Bul týraly Qazaqstannyń Avıatsııalyq ákimshiligi agenttiktiń resmı saýalyna bergen jaýabynda málimdedi.
Vedomstvo málimetinshe, áýejaılarda qustardy baqylaý arnaıy bekitilgen baǵdarlamalarǵa sáıkes júrgiziledi. Mamandar qustardyń kóp shoǵyrlanatyn oryndaryn anyqtap, olardy tartýy múmkin nysandarǵa nazar aýdarady.
– Áýeaılaqtardy paıdalanýshy uıymdar áýejaı aýmaǵy men oǵan irgeles jerlerdi turaqty túrde tekseredi. Qajet bolǵan jaǵdaıda qustardyń shoǵyrlanýyna jol bermeý úshin tıisti sharalar qabyldanady. Qustardy úrkitý tásili olardyń túrine, minez-qulqyna, sanyna jáne jyl mezgiline qaraı tańdalady. Sonymen qatar naqty qaýip deńgeıi de eskeriledi, – delingen Avıatsııalyq ákimshiliktiń jaýabynda.
Kóktemgi jáne kúzgi qustardyń qonys aýdarý kezeńinde baqylaý kúsheıtiledi. Bul ýaqytta áýejaı aýmaǵyn patrýldeý jıilep, qustardy úrkitý sharalary belsendirek júrgiziledi.
Máselen, Astanadaǵy Nursultan Nazarbaev halyqaralyq áýejaıynda qustardy úrkitý úshin gaz zeńbirekteri, statsıonarlyq jáne avtokólikterge ornatylǵan bıoakýstıkalyq júıeler, mehanıkalyq quraldar, qol lazerleri, dybystyq jáne pırotehnıkalyq qurylǵylar paıdalanylady.
Áýejaı málimetinshe, qajet bolǵan jaǵdaıda birneshe tásil qatar qoldanylady. Qustar belgili bir dybysqa nemese qurylǵyǵa úırenip ketpeýi úshin mamandar úrkitý ádisterin almastyryp otyrady.
Avıatsııalyq ákimshilik ókilderiniń túsindirýinshe, mundaı sharalardyń basty maqsaty – áýeaılaq aýmaǵynda qustardyń shoǵyrlanýyna jol bermeý jáne ushý qaýipsizdigin qamtamasyz etý.
Aıta keteıik, buǵan deıin Qazaqstanda ushaqtar kóbinese shaǵala, qarǵa, kepter jáne jyrtqysh qustarmen soqtyǵysatyny habarlanǵan bolatyn. Ásirese kóktemgi jáne kúzgi kóshi-qon kezeńderinde mundaı qaýip artady.
