Qazaqstan áýejaılarynda múgedektigi bar jolaýshylar úshin ne ózgeredi
ASTANA. KAZINFORM — Qazaqstan áýejaılarynda múgedektigi bar jáne erekshe qajettilikteri bar jolaýshylarǵa qyzmet kórsetý sapasyn arttyrý úshin birlesken jumys toby qurylady. Top ınfraqurylym qoljetimdiligin jaqsartý men qyzmet kórsetý talaptaryn jetildirý boıynsha usynystar ázirleıdi. Bul týraly Kólik mınıstrligi málim etti.
Qazaqstannyń avıatsııalyq ákimshiliginde áýe kóliginiń erekshe qajettilikteri bar jolaýshylar úshin qoljetimdiligin qamtamasyz etý máseleleri talqylandy. Keńeske QR Kólik mınıstrliginiń, Qazaqstannyń avıatsııalyq ákimshiliginiń, otandyq áýe kompanııalar men áýejaılardyń ókilderi, sondaı-aq múgedektigi bar adamdar men erekshe qajettilikteri bar basqa da jolaýshylardyń múddelerin bildiretin qoǵamdyq uıymdar men ınklıýzıvti qoǵamdastyqtardyń ókilderi qatysty.
Keńes barysynda normatıvtik talaptardy jetildirý, erekshe qajettilikteri bar jolaýshylarǵa qyzmet kórsetý statıstıkasy, sondaı-aq áýe kompanııalar, áýejaılar men qyzmet kórsetýshiler arasyndaǵy ózara is-qımyldyń praktıkalyq aspektileri qaraldy. Áýejaılardyń ınfraqurylym qoljetimdiligin arttyrý jáne jolaýshylarǵa qyzmet kórsetý sapasyn jaqsartý baǵytyndaǵy tájirıbeler tanystyryldy.
Almaty halyqaralyq áýejaıy men Astana halyqaralyq áýejaıynyń ókilderi erekshe qajettilikteri bar jolaýshylarǵa qyzmet kórsetý salasynda qoldanylatyn tásilder men praktıkalyq sheshimderdi usyndy.
Qatysýshylar múgedekter arbalary men basqa da qozǵalys quraldaryn tasymaldaý erekshelikterin, onyń ishinde olardy qaýipsiz tasymaldaýdy uıymdastyrý jáne áýe tasymaly protsesine qatysýshylardyń ózara is-qımylyn úılestirý máselelerin talqylady.
Keńestiń mańyzdy bóliginiń biri ınklıýzıvti qoǵamdastyq ókilderiniń máseleleri men usynystaryn talqylaýǵa arnaldy. Ózderiniń praktıkalyq tájirıbelerimen QR Eńbek jáne halyqty áleýmettik qorǵaý mınıstriniń shtattan tys keńesshisi, «Eńbek resýrstaryn damytý ortalyǵy» AQ-nyń sarapshy-keńesshisi Gúlnara Ahmoldına, «AUTISM KAZAKHSTAN» ulttyq qaýymdastyǵynyń tóraıymy, Aýtızm jónindegi Túrki memleketteri federatsııasyndaǵy Qazaqstan Respýblıkasynyń ýákiletti ókili Nurııa Baltabaıqyzy, «DOS» táýelsiz ómir ortalyǵy» múgedektigi bar adamdardyń qoǵamdyq birlestigi tóraǵasynyń keńesshisi Jańagúl Diljanova bólisti. Erekshe qajettilikteri bar jolaýshylardyń áýe kóligin paıdalaný kezinde kezdesetin ózekti máseleleri kóterildi.
Keńeske qatysýshylar memlekettik organdar, áýe kompanııalar, áýejaılar jáne ınklıýzıvti qoǵamdastyqtar ókilderi arasyndaǵy júıeli dıalogty jalǵastyrý qajettigin atap ótti. Bul rette normatıvtik talaptar men qyzmet kórsetý rásimderin jetildirý kezinde jolaýshylardyń ózderiniń praktıkalyq tájirıbesi men naqty qajettilikterin eskerý mańyzdy.
— Áýejaı ınfraqurylymy men qyzmetterdiń qoljetimdiligin qamtamasyz etý, sondaı-aq múgedektigi bar adamdar men halyqtyń basqa da júrip-turýy shekteýli toptaryna qyzmet kórsetý sapasyn arttyrý baǵytyndaǵy jumysty odan ári úılestirý jáne biryńǵaı tásilderdi ázirleý maqsatynda QR Kólik mınıstrligi Qazaqstannyń avıatsııalyq ákimshiligimen birlesip, memlekettik organdardyń, áýejaılardyń, avıakompanııalardyń jáne ınklıýzıvti qoǵamdastyqtardyń ókilderi qatysatyn birlesken jumys tobyn qurýǵa bastamashylyq jasady, — delingen habarlamada.
Jumys toby qoldanystaǵy talaptar men qyzmet kórsetý tájirıbesine taldaý júrgizýmen, problemalyq máselelerdi anyqtaýmen, erekshe qajettilikteri bar jolaýshylarǵa qyzmet kórsetýdi uıymdastyrýdyń biryńǵaı tásilderin ázirleýmen, sondaı-aq áýejaı ınfraqurylymy men qyzmetterdiń qoljetimdiligin arttyrý jáne barlyq múddeli taraptar arasyndaǵy ózara is-qımyldy jetildirý jóninde usynystar daıyndaýmen aınalysady.
Aıta keteıik, buǵan deıin Quryltaı depýtaty múgedektigi bar jastardyń «Bolashaqpen» bilim alýyna múmkindik jasaýdy usynǵan edi.
