Qazaqstan áýejaılarynda erekshe qajettiligi bar jolaýshylarǵa jaǵdaı jasalady
ASTANA. KAZINFORM – Qazaqstan áýejaılarynda erekshe qajettiligi bar azamattar úshin ınfraqurylymnyń qoljetimdiligin arttyrý jáne olarǵa kórsetiletin qyzmet sapasyn jaqsartý máseleleri talqylandy, dep habarlaıdy Kólik mınıstrligi.
Azamattyq avıatsııa komıtetinde ótken jumys keńesine Qazaqstannyń avıatsııalyq ákimshiligi men áýejaılardyń ókilderi, sondaı-aq erekshe qajettiligi bar adamdar úshin qoljetimdi ortany qamtamasyz etý máseleleri boıynsha Gúlnár Baımoldına qatysty.
Jıynda jolaýshynyń áýejaıǵa kelgen sátinen bastap ushýǵa deıingi barlyq negizgi kezeńderdegi ınfraqurylymnyń qoljetimdiligi qaraldy. Atap aıtqanda, termınalǵa irgeles aýmaqtan bastap, ǵımarat ishinde qajetti rásimderden ótý jáne qyzmetterdi paıdalaný múmkindikterine nazar aýdaryldy.
Arnaıy turaq oryndaryn uıymdastyrý, turaqtan termınalǵa deıin kedergisiz jetý, trotýarlardan túsý joldary, kireberister, pandýstar, baspaldaqtar men kótergish platformalardyń qoljetimdiligi máseleleri de kóterildi. Sonymen qatar jolaýshylar termınalynyń ishinde kedergisiz qozǵalý múmkindigin qamtamasyz etý qajettigi aıtyldy.
Kórý jáne estý qabileti tómen jolaýshylar úshin aqparat pen navıgatsııanyń qoljetimdiligine erekshe nazar aýdaryldy. Taktıldi mnemoshemalar men baǵyttaǵyshtardy, Braıl qarpin, vızýaldy aqparattandyrý quraldaryn jáne estý qabileti tómen adamdarǵa arnalǵan ındýktsııalyq júıelerdi paıdalaný máselesi talqylandy.
– Áýejaılarda tek pandýs nemese basqa da quraldardyń bolýymen shektelmeý kerek. Adam jolǵa shyqqan sátten bastap baratyn jerine deıin esh kedergisiz jetip, qajetti aqparatty erkin alyp, ózdiginen qozǵala alýy nemese qajet bolǵan jaǵdaıda qyzmetkerden kómek alýy úshin barlyq múmkindik ózara baılanysqan birtutas júıe retinde jumys isteýi qajet, – dedi Gúlnár Baımoldına.
Keńeste súıemeldeý qyzmetteriniń jumysy, aqparat jáne anyqtama bólimderiniń qoljetimdiligi, áýejaı qyzmetkerleriniń túrli jaǵdaıda kómek kórsetýge daıyndyǵy, sondaı-aq ana men bala bólmelerinde tıisti jaǵdaı jasaý máseleleri de qaraldy.
Áýejaı ókilderi mundaı máselelerdi birlesip talqylaý, praktıkalyq tájirıbe almasý jáne ınfraqurylym men qyzmet kórsetý rásimderin odan ári jetildirý mańyzdy ekenin atap ótti.
Keńes qorytyndysy boıynsha áýejaılarǵa nysandardyń qazirgi jaǵdaıy men jolaýshylardyń ártúrli sanattarynyń qajettilikterin eskere otyryp, qoldanystaǵy qyzmet kórsetý protsesterine qosymsha taldaý júrgizý usynyldy. Sondaı-aq qoljetimdilik salasyndaǵy zamanaýı halyqaralyq tájirıbelerdi engizý múmkindigin qarastyrý tapsyryldy.
Azamattyq avıatsııa komıteti men Qazaqstannyń avıatsııalyq ákimshiligi erekshe qajettiligi bar jolaýshylarǵa qyzmet kórsetý sapasyn arttyrý jáne azamattyq avıatsııa nysandarynyń qoljetimdiligin jetildirý baǵytyndaǵy jumysty áýejaılarmen birlesip jalǵastyrady.
Aıta keteıik, Jambylda 204 erekshe balanyń quqyǵy qorǵaldy.
