Qazaqstan áýejaılarynda kerosın arzandady
ASTANA. KAZINFORM – Qazaqstan áýejaılarynda áýe kerosınin ótkizý baǵasy tonnasyna 1000 AQSh dollaryna deıin tómendetildi.
QR Kólik mınıstrliginiń baspasóz qyzmetiniń habarlaýynsha, Memleket basshysynyń halyqaralyq áýe habtaryn damytý jónindegi tapsyrmasyna sáıkes, áýe kerosıni jetkizilimderiniń ashyqtyǵyn, turaqtylyǵyn jáne qoljetimdi baǵasyn qamtamasyz etý úshin 2026 jyly ulttyq kompanııa «QazMunaıGaz – Aero» Almaty jáne Astana qalalaryndaǵy iri áýejaılarda áýe kompanııalaryn tikeleı, ıaǵnı «qanatqa quıý» tásilimen janarmaımen qamtamasyz etýdi bastady.
Kólik mınıstrligi Energetıka mınıstrligimen birlesip, «QazMunaıGaz – Aero» kompanııasynyń áýejaı ınfraqurylymyna, onyń ishinde óńirlik áýejaılarǵa tikeleı qoljetimdiligin qamtamasyz etti.
Qabyldanǵan sharalardyń nátıjesinde Qazaqstan áýejaılarynda áýe kerosınin ótkizý baǵasy bir tonnasyna 1000 AQSh dollaryna deıin tómendetildi. Jańartylǵan baǵa boıynsha Turkish Airlines, Fly Dubai, Air Cairo, Somon Air, AJet, Pegasus Airlines, Red Sea Airlines, One Air, HungaryAirlines, Fly Meta áýe kompanııalary janarmaımen qamtamasyz etildi.
«QazMunaıGaz – Aero» deldaldarsyz áýe kompanııalaryna tikeleı janarmaı quıý kólemin ulǵaıtýdy josparlap otyr. Osyǵan baılanysty áýe kerosıniniń baǵasy kezeń-kezeńimen odan ári de tómendeıdi degen úmit bar. Qazirgi ýaqytta qazaqstandyq áýe kompanııalary qyzmet kórsetetin kórshiles memleketterde áýe kerosıniniń baǵasy tonnasyna 1200–1300 AQSh dollary aralyǵynda. Sonymen qatar, Qazaqstannyń 17 áýejaıynda reıster sany men baǵyttarǵa qoıylatyn shekteýlerdi alyp tastaıtyn «ashyq aspan» rejımi qoldanylady.
- Bul rejım sheteldik áýe kompanııalaryna áýe erkindiginiń besinshi dárejesin paıdalana otyryp, Qazaqstan Respýblıkasyna jáne onyń aýmaǵy arqyly ushýlardy oryndaý quqyǵyn beredi. Atalǵan sharalar avıatsııa salasynda óńirlik kóshbasshylyqty nyǵaıtýǵa jáne eldiń tranzıttik áleýetin damytýǵa yqpal etedi, - delingen habarlamada.
Osyǵan deıin Prezıdent óńirlik júk avıahabtaryn damytý jóninde keńeste avıaotyn máselesin túbegeıli sheshýdi tapsyrǵan bolatyn.