Qazaqstan áýe kompanııalarynyń jolaýshy tasymaldaý qyzmeti 8,5%-ǵa tómendedi
NUR-SULTAN. QazAqparat – Áýe kompanııalarynyń kiristeri eki esege tómendedi. Negizgi qysqartý jolaýshylar tasymaly boldy. Jolaýshylar bir jyl burynǵyǵa qaraǵanda 38%-ǵa, júk pen jol júgi 19%-ǵa az tasymaldandy, dep habarlaıdy QazAqparat Finprom.kz.
Qazan aıynyń qorytyndysy boıynsha áýe kompanııalary júzege asyrǵan jolaýshylar tasymaly qyzmetteriniń baǵasy bir aıda 2,4%-ǵa jáne bir jylda 8,5%-ǵa tómendegen.
El óńirleri arasyndaǵy eń arzan baǵa jyl kóleminde elordada (ótken jylǵy qazanǵa qaraǵanda 36,9%-ǵa), Almatyda (28,8%-ǵa) jáne Shymkentte (28,7%-ǵa) tirkeldi.
Elimizdegi 17 óńirdiń 4-ýinde baǵa ósken: Batys Qazaqstan (bir jylda 34,4%-ǵa), Atyraý (13,1%-ǵa), Qaraǵandy (11,6%-ǵa) jáne Qostanaı (4,5%-ǵa) oblystary.
Qazaqstannyń kóptegen óńirinde COVID-19 vırýsyn juqtyrýshylar sany artty. Bir aıda vırýsty eń kóp juqtyrǵandar 2 qarashadaǵy jaǵdaı boıynsha Shyǵys Qazaqstan, Aqmola, Qostanaı, Batys Qazaqstan jáne Pavlodar oblystarynda baıqalady.
Osyǵan baılanysty Qazaqstan memlekettik shekarada shekteý sharalaryn kúsheıtedi.
VAK birqatar sheshimder qabyldady: QR aýmaǵynda turýǵa yqtııarhaty bar sheteldikterge jáne QR azamattarynyń otbasy músheleri sanalatyn sheteldikterge QR memlekettik shekarasyn 90 táýlikte 1 retten asyrmaı (buryn – 30 táýlikte) kesip ótýge ruqsat etiledi;
2021 jylǵy 1 mamyrǵa deıin 57 eldiń azamattary úshin vızasyz rejım toqtatylady;
2021 jylǵy 1 qańtarǵa deıin QHR men Úndistannan keletin tranzıttik jolaýshylardyń QR aýmaǵynda 72 saǵattyq vızasyz bolýy toqtatylady;
Túrkııamen halyqaralyq áýe qatynasy aptasyna 33-ten 20 reıske deıin qysqarady.
2020 jyldyń qańtar-qazan aılarynda elimizdiń áýe kompanııalary 4,4 mıllıon adamdy tasymaldady – bul bir jyl burynǵy kezeńmen salystyrǵanda 38,2%-ǵa az. Tıisinshe qazan aıynda áýe tasymaldaryn 621,5 myń jolaýshy paıdalandy – bir aı burynǵyǵa qaraǵanda 2,1%-ǵa artyq. Alaıda 2019 jylǵy «koronavırýsqa deıingi» qazanmen salystyrǵanda birden 19,5%-ǵa az.
Aǵymdaǵy jyldyń on aıynda jolaýshylar aınalymy jylyna 2,1 ese qysqaryp, 6,8 mlrd jkm qurady. Qazan aıynda jolaýshylar aınalymy 917,2 mln jkm qurady – aǵymdaǵy jyldyń qyrkúıegine qaraǵanda 2,6%-ǵa jáne 2019 jyldyń qazanyna qaraǵanda 35,7%-ǵa az. Júk pen bagaj áýe kóligimen 17,5 myń tonna tasymaldandy – bir jyl burynǵyǵa qaraǵanda 18,5% - ǵa az.
Qazan aıynda áýe tasymaldary aǵymdaǵy jyldyń qyrkúıegimen salystyrǵanda 16,7%-ǵa jáne ótken jyldyń qazanymen salystyrǵanda 17,2%-ǵa qysqaryp, 2,1 myń tonnany qurady. Júk aınalymy 42,7 mln tkm qurady – bir jyl burynǵyǵa qaraǵanda 36%-ǵa az. Qazan aıynda júk aınalymy bir aıda 26,8%-ǵa jáne 2019 jylǵy qazanmen salystyrǵanda 53,5%-ǵa qysqaryp, 3,6 mln tkm qurady. Áýe kompanııalardyń kiristeri 154,2 mlrd teńgeni qurady – bir jyl burynǵyǵa qaraǵanda aqshalaı mánde birden 54%-ǵa az. Tabystyń 94,9%-y jolaýshylar tasymalyna tıesili: 146,4 mlrd teńge, qysqarý –jylyna 2,2 ese. Taǵy 5,1% júk tasymalyna keldi: 7,9 mlrd teńge, bir jyl ishindegi ósim –11,8%.
