Qazaqstan áýe kompanııalary úshin Eýropaǵa ushýǵa shekteý alynýy múmkin
ASTANA. QazAqparat - Qazaqstan áýe kompanııalary úshin Eýropaǵa ushýǵa shekteý alynýy múmkin. Bul týraly búgin Úkimet otyrysynda QR Investıtsııalar jáne damý mınıstri Jeńis Qasymbek málim etti, dep habarlaıdy QazAqparat.
«Ushýlar qaýipsizdiginiń laıyqty deńgeıin qamtamasyz etý maqsatynda IKAO-men júıeli jumystar júrgizilýde. Jyl basynda IKAO-nyń valıdatsııalyq mıssııasy júrgizilip, qorytyndysynda IKAO talaptaryna sáıkestik deńgeıi 65-ten 74 paıyzǵa deıin ósti. Ortasha eýropalyq deńgeı - 76 paıyz», - dedi ol.
Mınıstrdiń aıtýynsha, otandyq avıakompanııalardy Eýropalyq odaqtyń qaýipsizdik tiziminen shyǵarý máselesi boıynsha 2016 jyldyń qyrkúıeginde Eýropalyq komıssııamen elimizde ushýlar qaýipsizdigin qamtamasyz etý deńgeıine tehnıkalyq baǵalaý júrgizilgen.
«23 qarashada Brıýsselde Azamattyq avıatsııa komıteti Qazaqstandaǵy ushýlar qaýipsizdiginiń jaı-kúıi týraly esebin usynatyn bolady. Onyń qorytyndysynda Qazaqstan avıakompanııalaryna Eýropaǵa ushý shekteýlerin alý týraly sheshim qabyldanady», - dedi Qasymbek.
