Qazaqstan áýe keńistigin paıdalaný tártibi qandaı

ASTANA. KAZINFORM – Senat kýlýarynda jýrnalısterdiń áskerı tranzıtke qatysty suraqtaryna QR Qorǵanys mınıstriniń orynbasary Asqar Mustabekov jaýap berdi.

Onyń aıtýynsha, áskerı tranzıt halyqaralyq normalarǵa sáıkes júzege asyrylady jáne tolyq baqylaýda bolady.

- Halyqaralyq standart bar. Mysaly, Chıkago konventsııasy boıynsha kez kelgen memlekettiń áýe keńistigi – sol eldiń ajyramas bóligi. Ony paıdalaný sol memlekettiń zańdarymen retteledi. Qazaqstanda bul áýe keńistigin paıdalaný týraly zańmen rettelgen. Biz de óz kezegimizde basqa memleketterdiń áýe keńistigin tranzıt retinde paıdalanamyz, – dedi ol.

Spıkerdiń málimetinshe, Túrkııa baǵyty boıynsha kelisim aıasynda qazaqstandyq bitimgerlik kúshterdi tasymaldaý kezinde tranzıt qoldanylady.

- Qazirgi tańda bitimgerlik kúshter túrli taktıkalyq oqý-jattyǵýlarǵa qatysý úshin Túrkııa arqyly tranzıtpen ótedi. Sol sııaqty túrik tarapy da Qazaqstannyń áýe keńistigin paıdalana alady. ıAǵnı, qoný jasamaı, tek tranzıt arqyly ótedi, – dedi Qorǵanys mınıstriniń orynbasary.

Sondaı-aq ol tranzıttik tasymaldardyń barlyǵy aldyn ala kelisiletinin atap ótti.

- Áýe keńistigin paıdalaný úshin jyldyq nemese bir rettik suranys beriledi. Jyldyq suranys kelesi jylǵa 31 jeltoqsanǵa deıin usynylýy tıis. Onda tasymaldanatyn júktiń kólemi, túri, tonnasy jáne ony alyp júretin personal kórsetiledi. Quzyrly organdar bul málimetterdi qarap, eger ulttyq qaýipsizdikke qaýip tónbese jáne halyqaralyq kelisimderge qaıshy kelmese, ruqsat beredi, – dedi ol.

Sonymen qatar Qazaqstan tranzıt protsesin tolyq baqylaýda ustaıdy.

- Ushý barysynda kúmán týyndaǵan jaǵdaıda memleket áýe kemesin qondyryp, shekaralyq jáne kedendik tekseris júrgizýge quqyly. Jalpy, barlyq tranzıt tolyq baqylaýda bolady, – dep túıindedi spıker.

Buǵan deıin spıker Baykar Defence kompanııasynyń Qazaqstan aýmaǵynda kamıkadze-drondar men ushqyshsyz ushý apparattaryn óndirý múmkindigin qarastyrýyna baılanysty suraqqa jaýap bergen edi.