Qazaqstan ATR týrnırin ótkizýge kelisimder júrgizýde
ASTANA. QazAqparat - Qazaqstan ATR týrnırin ótkizýge kelisimder júrgizýde. Bul týraly Vesti.kz Qazaqstan tennıs federatsııasynyń prezıdenti Bolat Ótemuratovqa silteme jasap habarlaıdy.
«Bizde ATR 250 deńgeıinde halyqaralyq týrnır ótkizýge lıtsenzııa alý qajet degen maqsat bar. Eger de oılaǵanymyz iske asyp jatsa, ony qaıda ótkizetinimizdi ózimiz sheshemiz. Qazaqstannyń kez kelgen jerinde ótkizýimizge bolady. Al Astanada barlyq jaǵdaı jasalǵan qarsylastarymyzdy tań-tamasha qaldyratyn jáne ózimizdiń tennısshilerimiz óte jaqsy kóretin tennıs kortymyz bar. Degenmen, ótkizý ornyna baılanysty máseleni keıinge qaldyra turamyz», - dedi Ótemuratov.
QTF prezıdenti atap ótkendeı, bul sharýa biraz shyǵandalýdy talap etedi. Týrnırdi ótkizýge lıtsenzııa alýdan basqa, taǵy da birqatar qarjylyq shyǵyndar bar.
«Lıtsenzııa alǵan soń júlde qoryna, týrnırdi uıymdastyrýǵa, oıynshylardyń turatyn jerine, keıbir shaqyrylǵan qonaqtardyń ótemaqysyna qarjylaı shyǵyndar ketedi. Biz kórermenderdi tartý úshin álemdik TOP-20-lyqtan oıynshylardy shaqyrýǵa májbúr bolamyz. Sonymen qatar, qazaqstandyqtar da óz kezeginde qapy qalmaı, oıyndardy kórýge kelýleri qajet», - dedi ol.
Aıta keteıik, ATR Álemdik týr 250 serııasy (ATP World Tour 250 series) - bul 2009 jyldan beri ATR ótkizip kele jatqan kásibı tennıs týrnırleriniń serııasy. Onyń quramyna 40 týrnır enedi jáne osy týrnırlerdiń jeńimpazy 250 reıtıngtik upaı jınaıdy.
