Qazaqstan atom energetıkasyna baılanysty qyzmetterdi júzege asyrýdy josparlaýda
ASTANA. Qańtardyń 12-si. QazAqparat /Qanat Mámetqazyuly/ - Bul týraly búgin QR Parlamenti Májilisi Halyqaralyq ister, qorǵanys jáne qaýipsizdik komıtetiniń keńeıtilgen otyrysynda depýtattar ıadrolyq qaýipsizdik máselelerin qamtıtyn halyqaralyq konventsııalardy talqylaý barysynda málim boldy,
dep habarlaıdy QazAqparat.
«Qazaqstan sońǵy ýaqytta Japonııamen, Frantsııamen, Úndistanmen, Qytaımen jáne Kanadamen atom energetıkasyn beıbit maqsatta paıdalaný salasy boıynsha tyǵyz jumystar atqaryp keledi. Bundaı yntymaqtastyqtyń negizgi baǵdary sol memleketterden jańa tehnologııalar tartý bolyp tabylady. Máselen, aldaǵy ýaqytta Qazaqstan frantsýz kompanııasymen birige otyryp Óskemendegi Úlbi zaýytynda ýrandyq otyn qurandylaryn, otyn tabletkalaryn shyǵarýdy josparlaıdy. Al japondyqtamen birigip zertteý reaktorlaryn shyǵarý oıda bar. Degenmen, bundaı josparlardy júzege asyrý úshin atom energetıkasyn beıbit paıdalaný jónindegi yntymaqtastyq boıynsha birqatar halyqaralyq konventsııany ratıfıkatsııalaýy shart. Óıtkeni, atom energetıkasy salasyndaǵy bundaı tehnologııalardy birneshe maqsatta paıdalaný, onyń ishinde áskerı baǵytta qoldaný múmkindigi joǵary bolyp otyr. Al konventsııalardy ratıfıkatsııalaǵan Qazaqstan beıbit maqsatta paıdalanýda birqatar mindettemelerdi moınyna alady», dedi Energetıka jáne mıneraldyq resýrstar vıtse-mınıstri Áset Maǵaýov.
