Qazaqstan atom energetıkasyndaǵy áleýetin álemge tanystyrdy
ASTANA. KAZINFORM — 15 qyrkúıekte Vena qalasynda Atom energııasy jónindegi halyqaralyq agenttiktiń (AEHA) Bas konferentsııasynyń 70-sessııasy aıasynda Qazaqstan Respýblıkasynyń ulttyq stendiniń resmı ashylý rásimi ótti. Bul týraly Atom energııasy týraly agenttik málim etti.
Rásimge AEHA Bas dırektory Rafael Marıano Grossı jáne Qazaqstan delegatsııasynyń basshysy, Qazaqstan Respýblıkasy Atom energııasy jónindegi agenttigi tóraǵasynyń orynbasary Gumar Serǵazın qatysty.
Ulttyq stendtiń ashylýynda Gumar Serǵazın Qazaqstan men AEHA arasyndaǵy áriptestiktiń joǵary deńgeıin atap ótip, Rafael Grossıge Qazaqstannyń atom salasyn damytýǵa kórsetip kele jatqan dáıekti qoldaýy úshin alǵys bildirdi.
— Qazaqstan men AEHA arasyndaǵy yntymaqtastyq odan ári keńeıip, jyl saıyn praktıkalyq ári mazmundy sıpat alyp keledi, — dedi Gumar Serǵazın.
Qazaqstan delegatsııasynyń basshysy Rafael Grossıdiń aǵymdaǵy jyldyń mamyr aıynda Qazaqstanǵa jasaǵan saparynyń nátıjelerine de toqtaldy. Bul sapar ekijaqty yntymaqtastyqqa jańa serpin berdi. Sapar barysynda Qazaqstan men AEHA arasyndaǵy 2026–2036 jyldarǵa arnalǵan yntymaqtastyq jónindegi Jol kartasyna qol qoıyldy. Qujat atom energetıkasy, ıadrolyq jáne radıatsııalyq qaýipsizdik, ǵylym men bilim berý, ıadrolyq medıtsına jáne kadrlar daıarlaý baǵyttaryn qamtıdy.
Ashylý rásiminde sóz sóılegen AEHA Bas dırektory Rafael Marıano Grossı Qazaqstan men AEHA arasyndaǵy ózara is-qımyl deńgeıine joǵary baǵa berip, atom energııasyn beıbit maqsatta paıdalaný salasyndaǵy yntymaqtastyqtyń júıeli túrde damyp kele jatqanyn atap ótti. Ol Qazaqstannyń atom salasyndaǵy eleýli áleýetin atap, AEHA-nyń eldiń basym baǵyttaryn iske asyrýǵa, onyń ishinde atom energetıkasyn damytýǵa, ıadrolyq qaýipsizdikti nyǵaıtýǵa, ıadrolyq tehnologııalardy qoldanýǵa, ǵylymdy damytýǵa jáne kadrlar daıarlaýǵa qoldaý kórsetýdi jalǵastyrýǵa daıyn ekenin bildirdi.
Ulttyq stendte Qazaqstannyń atom salasyndaǵy tórt jetekshi uıymy — «Qazatomónerkásip» UAK» AQ, «Qazaqstan atom elektr stantsııalary» JShS, Qazaqstan Respýblıkasynyń Ulttyq ıadrolyq ortalyǵy jáne ıAdrolyq fızıka ınstıtýty usynylǵan.
Ekspozıtsııa Qazaqstannyń ıadrolyq otyn tsıkli, atom energetıkasy, ıadrolyq ǵylym men tehnologııalar salalaryndaǵy jetistikteri men quzyretterin tanystyrady. Sonymen qatar ulttyq stend jańa iskerlik jáne ǵylymı baılanystar ornatýǵa, halyqaralyq yntymaqtastyqty damytýǵa, birlesken jobalar, zertteýler men ınvestıtsııalardyń perspektıvalaryn talqylaýǵa arnalǵan alańǵa aınalmaq.
AEHA Bas dırektorynyń ulttyq stendtiń ashylýyna qatysýy Qazaqstan men Agenttik arasyndaǵy belsendi dıalogtyń jalǵasy bolyp, qalyptasqan áriptestiktiń joǵary deńgeıin taǵy bir márte rastady.
AEHA Bas konferentsııasynyń 70-sessııasy Venada 2026 jylǵy 14–18 qyrkúıek aralyǵynda ótedi.
Aıta keteıik, atom energetıkasy men jasandy ıntellekt termınderi qazaq tilinde júıelenedi.
