Qazaqstan atom energetıkasyn damytý úshin qandaı tehnologııa qoldanady
ASTANA. KAZINFORM – Qazaqstan atom energetıkasyn damytý aıasynda alǵashqy stantsııalar úshin III+ býyndaǵy zamanaýı reaktorlyq tehnologııalardy qoldanýdy josparlap otyr.
Atom energııasy jónindegi agenttiktiń málimetinshe, bul tehnologııalar joǵary senimdiligimen jáne qaýipsizdiktiń ozyq júıelerimen erekshelenedi.
Atap aıtqanda, reaktorlar operatordyń qatysýynsyz jáne syrtqy elektrmen jabdyqtaýsyz jumys isteı alatyn passıvti qorǵanys mehanızmderimen jabdyqtalǵan.
«Alǵashqy stantsııalar úshin III+ býyndaǵy zamanaýı reaktorlyq tehnologııalar tańdaldy. Olar joǵary senimdiligimen jáne zamanaýı qaýipsizdik júıelerimen, sonyń ishinde operatordyń jáne syrtqy elektrmen jabdyqtaýdyń qatysýynsyz jumys isteıtin passıvti qorǵanys mehanızmderimen erekshelenedi», – delingen agenttik habarlamasynda.
Sondaı-aq jobalyq sheshimder halyqaralyq tájirıbege negizdelgen.
«Jobalyq sheshimder halyqaralyq tájirıbeni, sonyń ishinde Japonııadaǵy “Fýkýsıma-Daııchı” atom elektr stantsııasyndaǵy apattan alynǵan sabaqtardy eskeredi jáne tipti óte sırek bolatyn aýyr apattar kezinde radıoaktıvti materıaldardyń taralýyn boldyrmaýǵa arnalǵan arnaıy sharalardy qamtıdy», – dep atap ótti vedomstvo.
Aıta keteıik, Qazaqstan men Koreıa atom energetıkasy jobalaryn birlesip damytýǵa nıetti.
