Qazaqstan Ata zańynyń 15 jyldyǵy - bul úlken tarıhı oqıǵa - S. Sartaev

ALMATY. Tamyzdyń 24-i. QazAqparat /Ádilet Musahaev/ - Búgin Almatydaǵy Ál-Farabı atyndaǵy Qazaq Ulttyq ýnıversıtetinde «Qazaqstan Respýblıkasynyń Konstıtýtsııasyna 15 jyl: teorııa men tájirıbeniń máseleleri» atty taqyrypta alqaly jıyn ótti,

dep habarlaıdy QazAqparat.

Jıyn barysynda elimizdiń jetekshi zańgerleri men saıasatkerleri Konstıtýtsııa Qazaqstan Respýblıkasynyń ulttyq qaýipsizdiginiń kepili, Konstıtýtsııany jetildirý máseleleri, Eńbek teorııasy men tájirıbesi týraly konstıtýtsııalyq qalyp, Adam quqyǵy men bostandyǵyn konstıtýtsııalyq turǵydan qamtamasyz etý jáne taǵy basqa taqyryptar boıynsha pikir almasyp, talqylady.

QR Ulttyq ǵylym akademııasynyń akdemıgi, zań ǵylymdarynyń doktory, professor Sultan Sartaevtyń aıtýynsha, Qazaqstan Ata zańynyń 15 jyldyǵy - bul úlken tarıhı oqıǵa. «Bul jerde Elbasynyń róliniń mańyzdylyǵyn atap ótkim keledi, óıtkeni 15 jyl buryn halyqaralyq keńistiktegi Qazaqstan jaıly eshkim aıtpaǵan. Sondyqtan tap búgingi deńgeıge eldi Memleket basshysy Nursultan Nazarbaev shyǵardy dep sanaımyn», deıdi S.Sartaev.

Akademık Ata zańymyzdyń biregeıligin aıta kele til jaıyndaǵy zańnyń qabyldaný mańyzdylyǵyna toqtalyp ótti. «Til týraly zańdy qabyldaý kezinde qazaq tilimen qosa orys tilin de memlekettik til retinde qabyldaıyq degen usynystar túsip jatqan. Sol tusta Elbasy kóregendik tanytyp, memlekettik til qazaq tili bolatyndyǵyn moıyndatyp, qazaq tiliniń odan ári órkendeýine jol ashqan edi», dep atap ótti.