Qazaqstan at sportynan Astanadaǵy halyqaralyq týrnırlerde 14 medal jeńip aldy
ASTANA. KAZINFORM –Astanada at sporty boıynsha halyqaralyq týrnırler serııasy óz máresine jetti.
Úsh kúnge sozylǵan jarys barysynda arenada Qazaqstan, Ózbekstan, Qyrǵyzstan, Brazılııa, Úndistan, Belarýs, Kolýmbııa, Marokko, Ońtústik Afrıka Respýblıkasy jáne ózge de elderdiń sportshylary baq synady.
Týrnırler serııasy FEI Jumping World Challenge fınaly men konkýrdan CSI-W álem kýbogy kezeńimen bastaldy. CSI-W FEI Jumping World Cup jarysynda Ózbekstan ókili Hýrshıdbek Alımjanov CHAMPIONS LEAGUE tulparymen top jardy. Qazaqstandyq Bekjan Baıjanuly KING DIAMOND sáıgúligimen kúmis medal ıelense, qyrǵyzstandyq Rınat Galımov D’ARTAGNAN Z tulparymen úzdik úshtikti túıindedi.
FEI Jumping World Challenge Final 2026 týrnıriniń alǵashqy irikteý saıysynda Ózbekstan sportshysy Bekzod Rozmýhamedov FLORIZELL tulparymen jeńiske jetti. Ekinshi oryndy brazılııalyq Bernardo Kraýs Gerra ıelendi. Al jańa zelandııalyq Eımı Kollınson úzdik úshtikti túıindedi.
Jarystyń alǵashqy kúnindegi eń kúrdeli syndardyń biri CSI-W FEI Jumping World Cup aıasyndaǵy Equestrian Cup Gran-prıiniń irikteý baǵyty boldy. Bul básekede qazaqstandyq Oleg Sokolenko CINDERELLA sáıgúligimen jeńiske jetti. Beıtarap mártebede synǵa túsken Sergeı Petrov ekinshi oryn alsa, Olesıa Lýkına (beıtarap mártebe) qola medalǵa ıe boldy.
Challenge Final týrnıriniń ekinshi irikteý kezeńinde de Bekzod Rozmýhamedov úzdik nátıje kórsetti. Marokkolyq Nal Zerýal kúmis júldege ıe bolsa, brazılııalyq Bernardo Kraýs Gerra qola medal jeńip aldy. Úzdik bestiktiń qataryna qazaqstandyq Ánýar Dosmaılov ta endi.
CDI 1* (St. George) baǵdarlamasy boıynsha ótken dressýra jarysynda ózbekstandyq Alına Shevtsova jeńimpaz atandy. Qyrǵyzstan ókili Ekaterına Karkavtseva ekinshi oryn ıelense, qazaqstandyq Darıa Popova qola medalǵa qol jetkizdi.
Jarystyń ekinshi kúninde Darıa Popova CDI Intermediate I baǵdarlamasynda ekinshi nátıje kórsetti. Al CDI 3* Gran-prıinde taǵy da Alına Shevtsovaǵa teń keler sportshy bolmady. Ekaterına Karkavtseva bul synda úshinshi oryn aldy.
QR UOK málimetinshe, CSI-W álem kýbogy kezeńindegi 135 santımetrlik baǵytta Oleg Sokolenko qola medal ıelendi. Qazaqstan qorjynyna taǵy bir altyn júldeni Raısa Sokolenko saldy. Ol URAN-NAD WIGRAMI tulparymen ULTIMA YANDEX CUP jarysynda jeńiske jetti.
Týrnırdiń eń tartysty jarystarynyń biri Six Bar Jump-Off boldy. Bul synda kedergilerdiń bıiktigi 170 santımetrge deıin jetti. Nýrıla Týrısbekova men ıAsmın Ibragımova jeńimpaz atanyp, Qazaqstan qorjynyna eki altyn medal saldy.
Sheshýshi jarys kúninde FEI Jumping World Challenge Final týrnıriniń jeńimpazdary anyqtaldy. Bıiktigi 120 santımetr bolatyn fınaldyq baǵytta brazılııalyq Bernardo Kraýs Gerra top jardy. Kúmis medaldi Bekzod Rozmýhamedov ıelense, kolýmbııalyq Nıkolas Rodrıges Posada qola júldege qol jetkizdi.
CSI-W AEF/Mantena CUP (135 sm) jarysynda Oleg Sokolenko SHENANIGAN tulparymen chempıon atandy. Sondaı-aq ol SELLY BLUE sáıgúligimen ekinshi oryn aldy. Qola medal Nýrıla Týrısbekovaǵa buıyrdy.
Týrnırler serııasynyń basty jarysy kedergiler bıiktigi 160 santımetr bolatyn Grand Prix Maxima Masters Eurasia Cup CSI-W básekesi boldy. Bul dodada beıtarap mártebede óner kórsetken Bogdan Vaskovskıı jeńimpaz atandy. Ksenııa Haırýlına kúmis júldege ıe boldy. Al qyrǵyzstandyq Kamıl Sabıtov qola medal jeńip aldy.
CDI 1* (Intermediate I Freestyle AEF/Mantena Cup) baǵdarlamasynda Darıa Popova Qazaqstanǵa qola medal syılady. Al GRAND PRIX FREESTYLE CDI 3* jarysynda taǵy da Alına Shevtsova jeńiske jetti.
Úsh kúnge sozylǵan halyqaralyq týrnırler qorytyndysy boıynsha Qazaqstan quramasy óz alańyndaǵy jarystarda 14 medal jeńip aldy.
Astanada úsh birdeı FEI týrnıri qatar ótetinin jazǵan edik.
