Qazaqstan astyqty konteınermen eksporttaı bastaıdy

ASTANA. QazAqparat - Qazaqstan astyqty konteınermen eksportqa shyǵarýdy jolǵa qoımaq.  Bul týraly búgin Úkimet úıinde ótken baspasóz máslıhatynda «QTJ - Júk tasymaly» AQ-nyń prezıdenti Oralhan Qulaqov aıtty, dep habarlaıdy QazAqparat.

«Biz astyq tasymaldaýdyń jańa tehnologııalaryn engizý baǵytynda da jumys júrgizýdemiz. Máselen, osy jyldyń qazan aıynda «Quryq-Alıat-Ahalkalakı-Kars-Mersın» jańa baǵytynda konteınermen astyq tasymaldaýdyń  ilki jobasyn júzege asyrdyq. Keleshekte atalǵan baǵytta aı saıyn 10 myń tonnaǵa deıin astyqty tasymaldaý josparlanýda», - dedi Qulaqov.

Onyń aıtýynsha, un tasymaldaýdaǵy problema astyq tasymaldaýda týyndaıtyn jaıttarmen birdeı dese de bolady. Jalpy elimiz unynyń negizgi bóligi Aýǵanstanǵa tasymaldanady.

«Aýǵanstan baǵytyndaǵy logıstıka jetkizý jyldamdyǵynyń óte tómendigimen jáne Aýǵanstannyń Haıraton, Akın jáne Týrgýndı qabyldaý stansalaryndaǵy júkti túsirý múmkinshiliginiń álsizdigimen sıpatalady. Sebebi aýǵan tarabynda vagondaǵy júkti  túsirý avtomattandyrylmaǵan. Júk túsiretin stansalardy taýarlar irkilisi de jıi oryn alady», - dedi ol.