Qazaqstan astyq tasymaldaıtyn kemeler sanyn 20-ǵa jetkizedi

ASTANA. QazAqparat - Qazaqstan aldaǵy 5 jyldyń ishinde astyq tasymaldaıtyn kemeler sanyn 20-ǵa jetkizedi. Bul týraly búgin Úkimet úıinde ótken baspasóz máslıhatynda «QTJ - Júk tasymaly» AQ-nyń prezıdenti Oralhan Qulaqov aıtty, dep habarlaıdy QazAqparat.

«Kaspıı arqyly tasymal áleýetiniń barynsha joǵary ósimin  qamtamasyz etý úshin port  ınfraqurylymy damytylýda. Aqtaý portyn soltústikke qaraı keńeıtý jobasy aıaqtaldy. Quryq portynda temir jol jáne parom kesheni paıdalanýǵa berildi jáne kelesi jyldyń basynda onyń ekinshi fazasy logıstıkalyq ınfraqurylymy men kedendik qyzmet kórsetý aımaǵy bar avtomobıldik parom kesheniniń qurylysy aıaqtalatyn bolady», -  dedi ol.

Kompanııa basshysynyń aıtýynsha, Aqtaý halyqaralyq portyn keńeıtý jáne Quryq parom keshenin salý esebinen Qazaqstannyń Kaspıı arqyly júk tasymaldaý kólemi qazirgi jylyna  16 mıllıon tonnadan 2018 jyly 26 mıllıon tonnaǵa deıin artatyn bolady.

«Sonymen qatar kompanııa Kaspıı men Qara teńizge senim arta otyryp, menshikti qurǵaq júk tasıtyn paromdy flot quryp, taıaý 5 jyldyń ishinde kemeler  sanyn 4-ten 20-ǵa jetkizýdi josparlaýda», - dedi Qulaqov.