Qazaqstan astyq pen un eksportyna shekteý engizedi

NUR-SULTAN. QazAqparat - QR Aýyl sharýashylyǵy mınıstrligi un eksportyna salynǵan tyıymdy alyp tastap, astyqty shetke shyǵarýǵa shekteý engizedi, dep habarlaıdy QazAqparat tilshisi.

Mınıstrliktiń baspasóz qyzmeti habarlaǵandaı, elimizdiń astyqqa degen ishki qajettiligin qamtamasyz etý maqsatynda (onyń ishinde azyq-túlik kólemin saqtaý jáne tamaq ónerkásibin qaıta óńdeý úshin) tótenshe jaǵdaı kezinde bıdaı eksportyna shekteý engizilmek. Sondaı-aq, QR AShM undy eksporttaý boıynsha tyıymdy alyp tastap, onyń ornyna undy respýblıkadan tys jerge shyǵarýǵa shekteý qoıady.

«Osyǵan oraı endi bıdaı men un eksporty QR Aýyl sharýashylyǵy mınıstrligi aı saıynǵy belgilegen kvota sheńberinde júzege asyrylady. Kvotalardy bólý men olardyń kólemi aldaǵy ýaqytta mınıstrliktiń resmı ınternet resýrsynda jarııalanady», - dep habarlaıdy mınıstrlikten.

Sondaı-aq mınıstrlik respýblıkada qansha astyq kólemi bar ekenin jarııalady.

«QR Ulttyq ekonomıka mınıstrligi statıstıka komıtetiniń málimetinshe, 2020 jyldyń 1 naýryzyndaǵy aqparatqa sáıkes Qazaqstanda 9,2 mln tonna, onyń ishinde azyq-túlik – 6,4 mln tonna, tuqymdyq – 1,5 mln tonna, jemdik – 1,3 mln tonna astyq bar», - dep habarlaıdy mınıstrliktiń baspasóz qyzmetinen.