Qazaqstan astyq óndirýshiler odaǵy ımportqa tyıym salýdy usyndy

NUR-SULTAN. QazAqparat – Bıyl elimizde 3-synypty bıdaı tonnasyn 125 myń teńge, al 4-synypty bıdaıdyń tonnasyn 120 myń teńgeden tómendetpeý kerek. Atalǵan baǵany Qazaqstan astyq óndirýshiler odaǵynyń tóraǵasy Nurlan Ospanov usynyp otyr, dep habarlaıdy QazAqparat tilshisi.

Elimizdiń astyq óndirýshiler odaǵy bıyl 1 qyrkúıekten bastap astyq ımportyna tyıym salýdy usynyp otyr.

Sondaı-aq, odaq basshysynyń pikirinshe, 3-synypty bıdaıdyń tonnasyn 125 myń teńge, al 4-synypty bıdaıdyń tonnasyn 120 myń teńgeden tómendetpeý kerek.

Odan bólek, odaq astyq naryǵynda turaqty suranysty saqtaı otyryp, eksportty shekteýden bas tartýdy usynady. Sol sııaqty eksporttyq baǵa dempıngine jol beretin tulǵalarǵa qatysty jedel shara qabyldaýdy usynady.

«Ótken jyly biz baj salyǵyna tyıym salatynymyzdy jarııalap, seriktesterimizdi bir qorqytyp aldyq. Sóıtip júrgende 2-3 aı ótti, al bizdiń satyp alýshylar alsaq pa, almasaq dep oılanyp qaldy. Mundaı jaǵdaıda sheshimdi sozbaý kerek, sebebi naryq kútpeıdi, basqa jaqqa bet burady. Qazir biz ımporttaýshy elderdiń Qazaqstandy seriktes retinde qarastyrmaıtynyn baıqap otyrmyz. Osy oraıda olar satyp alýdyń basqa jolyn izdeıdi, sonyń biri kórshimiz — Reseı. Ol elde bıdaı ónimi mol jáne baǵa tómen. Al biz bolsaq eksportty rettep, otandyq óndirýshilerdiń tabys tabýyna kedergi keltirip otyrmyz», - dedi Nurlan Ospanov elordada ótken dóńgelek ústel barysynda.

Onyń aıtýynsha, astyq óńdeýshiler men eksporttaýshylar naryqta qalýy úshin tólemge qabiletti suranysty qurý qajet. Sonda ǵana básekelestik artyp, naryqtyq ádil baǵa bolady.

Buǵan deıin Irannyń bizdiń arpadan bas tartýy múmkin ekeni týraly habarlaǵan edik.

Sonymen qatar qazaqstandyq astyq óndirýshilerdiń shyǵynǵa batý qaýpi bary aıtyldy.