Qazaqstan astyq naryǵyn memlekettik retteý formasyn jetildirýi qajet - S.Ahmetov
ASTANA. 16 naýryz. QazAqparat - Qazaqstan astyq naryǵyn memlekettik retteý formasyn jetildirýi qajet.
Bul týraly búgin «KAZGRAIN-2012» V qazaqstandyq astyq forýmy barysynda QR Premer-Mınıstriniń birinshi orynbasary Serik Ahmetov aıtty.
«Astyq máselesi Qazaqstan úshin erekshe mańyzdy ekendigi belgili. Sondyqtan Elbasynyń tapsyrmasyna sáıkes elimizde aýyl sharýashylyǵyn órkendetý, onyń ishinde astyq óndirý salasyn jańǵyrtý sharalary qolǵa alynýda. Búgingi kúnniń ózekti máseleleriniń biri jalpy Qazaqstannyń astyq holdıngin qurý», - dedi ol.
Onyń atap ótýinshe, aǵymdaǵy marketıng jylynda memlekettik qoldaýdy arttyrý jáne zamanaýı agrotehnologııany qoldaýdyń arqasynda respýblıkada 22,7 mıllıon tonna astyq jınaldy. Bul elimizdiń eksporttyq áleýetin 15 mıllıon tonnaǵa jetkizýge múmkindik beredi.
«Qazaqstannyń astyǵy men unyn álemdik naryqqa, onyń ishinde Ortalyq jáne Ońtústik-Shyǵys Azııaǵa shyǵarýda astyq naryǵyn memlekettik retteýdiń formasyn jetildirý qajet etiledi», - dep atap ótken S.Ahmetovtiń paıymynsha, ol úshin astyqty saqtaý jáne tasymaldaý ınfraqurylymdaryn damytý, jańa astyq qoımalaryn salý, aılaqtyq termınaldardyń qurylysyn júrgizý, astyq tasymaldaıtyn vagondar satyp alý syndy sharalardy atqarýymyz qajet.
