Qazaqstan astyq eksporttaýshy álemdik alpaýyttardyń bestigine ene alady
ASTANA. 16 naýryz. QazAqparat - Qazaqstan álemdik astyq eksporttaýshylar alpaýyttarynyń bestigine kire alady.
Bul pikirdi búgin «KAZGRAIN-2012» V qazaqstandyq astyq forýmy barysynda Qazaqstan Astyq odaǵynyń prezıdenti Nurlan Tileýbaev bildirdi.
«Men Qazaqstan negizgi astyq eksporttaýshylardyń bestigine kire alady dep sanaımyn. Óıtkeni ol ózine memlekettik kompanııalardyń balanysynda bolýy múmkin 5 mıllıon tonna kóshpeli astyq qoryn qaldyra alady. Qarjylyq resýrstar da, bıdaıdyń kepilmen satylýy da osyndaı qordyń bolýyna múmkindik beredi», - dedi ol.
Onyń paıymynsha, elimizde jetkilikti astyq qoımalarynyń bolmaýy astyq eksportyndaǵy túıtkildi jaıttardyń birine aınalyp otyr. Altyn dán eksportynyń adymyn ashtyryp, tynysyn keńeıtý úshin osyndaı qoımalardy salýǵa múmkinshilik berý qajet. Bul rette astyq óndiretin sharýa qojalyqtary qoımanyń qajettiligin óte jaqsy túsingenimen, ony salýǵa qajetti qarjyny bólýge qaýqarsyz. Sondyqtan da onyń qurylysyna eksporttaýshylar da óz úlesin qosýy kerek.
«Búginde Qazaqstanda jaıly ınvestıtsııalyq ahýal qurylǵan. Tipti Qazaqstannyń rezıdenti bolyp tabylmaıtyn kompanııalar da elimizde eki aptanyń ishinde tirkelip, astyq eksporttaýǵa múmkindik ala alady», - dedi ol.
