Qazaqstan astyǵynyń baǵasy ósýi múmkin
ALMATY. Shildeniń 29-y. QazAqparat /Erlik Erjanuly/ - Búgin "Eýrazııa saýda júıesi" taýar bırjasyndaǵy astyq saýdasynda baǵa aýytqýy tirkelgen joq,
dep habarlaıdy QazAqparat bırjanyń baspasóz qyzmetine silteme jasap.
Bir kún buryn onda 3-4 synypty bıdaıǵa fıýcherstik kelisimsharttar jelisinde baǵanyń ósýi 3,3 paıyzdy quraǵan bolatyn. "Torıno-06" brokerlik kompanııasynyń dırektory Orazbek Sársenbiniń aıtýynsha, Qazaqstan astyǵy baǵasynyń kóterilýi múmkin. 2010-2011 marketıngtik jylda 2003 jylǵy stsenarııdiń qaıtalanýy yqtımal. Ol kezde astyq ónimdiliginiń tómendiginen Reseı óziniń eksporttyq ýádelerin oryndaý úshin Qazaqstannan satyp alǵan bolatyn. Qazir astyq naryǵyna qatysýshylar arasynda astyqty qazir satqan durys pa, joq kúzdi kútken jón be degen oı mazalaýda.
2-3 apta buryn batystaǵy taýar naryqtarynda Reseı, Kanada Ýkraına, Qazaqstan jáne birqatar Eýropa Odaǵy elderinde astyq ónimdiligine jasalǵan boljamnyń qaıta qaralýy týraly aqparattar boıynsha, bıdaı baǵasy 15-ten 25 paıyzǵa deıin kóterilgen edi. Qazirgi tańda astyq quny shamaly ǵana tómendedi. "Eýrazııa saýda júıesi" taýar bırjasynda 3-4 synypty astyqtyń fıýchersi shildeniń bas kezindegi kórsetkishpen salystyrǵanda orta eseppen 17 paıyzǵa qymbattady.
