Qazaqstan astyǵyn Qytaıǵa úlken kólemde eksporttaýǵa ne kedergi

ASTANA. QazAqparat - Qazaqstan astyǵynyń eksport deńgeıi kóp jaǵdaıda Reseı astyǵy tóńiregindegi ahýalǵa baılanysty. Bul jaıynda búgin Ortalyq kommýnıkatsııalar qyzmetindegi brıfıngte «Atameken» Qazaqstannyń ulttyq kásipkerler palatasy Agro quziret ortalyǵynyń dırektory Tóleýtaı Rahymbekov málim etti, dep habarlaıdy QazAqparat.

«Ókinishke oraı, bizdiń astyqtyń baǵasy halyqaralyq naryqtaǵy baǵa men Qazaqstan astyǵy tóńiregindegi jaǵdaıǵa baılanysty emes. Ózderińiz de biletindeı, naryqtyq jaǵdaıda barlyǵy da suranys pen usynysqa táýeldi. Suranys bolsa, baǵa ósedi, usynys bolmaǵan jaǵdaıda da, baǵa kóteriledi. Birtúrli kórinse de biz Reseıdegi astyq jaǵdaıyna táýeldimiz. Eger, Reseıde astyq ortashadan tómen, shamamen 70-80 mln. tonna bolsa, onda olar shekarany ashady. Biz vagondardy alyp Qara teńizge deıin jetkizemiz, astyǵymyzdyń baǵasy kóteriledi. Olar qazirgi ýaqyttaǵydaı jaqsy ónim, shamamen 90 mln. tonna astyq jınaǵanda, barlyq shekara jabylady. Porttardyń ótkizý múmkinshilik bolmaıdy, vagondar da joq», - dedi Rahymbekov.

Sondyqtan da onyń paıymynsha, Qazaqstan astyq alqaptaryn qysqartyp, olardyń ornyna aýyl sharýashylyǵynyń basqa da daqyldaryn ósirýge bet burýy qajet.

«Buǵan qosa, qazirgi ýaqytta Reseı ózderiniń astyq kólemin 120-130 mln. tonnaǵa deıin  ulǵaıtýdy josparlaýda. Al temir jol men teńiz prottarynyń ótkizý qabileti ulǵaıtylmaq emes. Endeshe, bizge Reseıdegi jaǵdaı qalaı bolady dep kútip otyrý qajet pe? Eldiń shynaıy ishki qajettiligi shamamen 8 mln. tonna. Ol - azyqtyq astyq, jemdik bıdaı jáne tuqym. Biz shamamen 4-5 mln. tonna astyqty Ortalyq Azııa elderi - Tájikstan, Túrkimenstan, Ózbekstan jáne Aýǵanstanǵa eksporttaı alamyz. Qorytyndysynda 12-13 mln. tonna jetkilikti», - dedi ol.

Rahymbekov astyǵymyzdy qytaı naryǵyna shyǵarý múmkinshiligine de keńinen toqtaldy.

«Barlyǵy da Qytaıdy aıtady. Qytaı halqynyń ómirlik deńgeıiniń artýyna baılanysty tamaqtaný mádenıeti de ózgerýde. Et, kókónis jáne nandy kóptep tutyna bastaǵan. Eger árbir qytaılyq kúnine bir tilim nan jeıtin bolsa, onda jylyna 20 mln. tonna astyq qajet bolady. Bul bizdiń búkil ónimimiz. Biraq, bul qashan oryn alady. Qazirgi kúni Qytaı osydan 13 jyl buryn DSU-ǵa kirgen kezde óz moınyna alǵan kelisimder men mindettemelerge baılanyp otyr. Qytaı AQSh pen Eýropany ózderiniń toqyma matalary úshin shekarany ashýǵa tabandap kóndirdi. Al buǵan ótem retinde AQSh, Argentına jáne Avstralııa Qytaıǵa astyq, soıa boıynsha ishki naryǵyn ashýǵa kóndirdi», - dep atap ótti Rahymbekov.