Qazaqstan astyǵy Kavkaz elderine eksporttalýy múmkin - "QazAgro" AQ basshysy
Esterińizge sala keteıik, kórshiles Reseı óz eli aýmaǵynda oryn alǵan qurǵaqshylyqqa baılanysty astyq túsiminiń tómen bolatynyn eskere kele, tamyzdyń 15-inen beri qaraı bıdaı eksportyna tyıym salǵan bolatyn. «Árıne, osynyń arqasynda bizde eksporttyq geografııamyz belgili bir kólemde keńeıetin bolady. Meniń oıymsha, eń aldymen bizdiń áleýetti ımporttaýshylarymyz Kavkaz elderi bolýy yqtımal. Olar ózderi budan buryn satyp alýǵa josparlaǵan astyq mólsherin qazaqstandyq naryqqa qaraı baǵyttap, suraý jasaı alady», dedi A. Mamytbekov. Sonymen birge, kompanııa basshysy qazaqstandyq astyqty Ortalyq Azııa elderine qaraı tasymaldaý da artýy múmkindigin joqqa shyǵarmaıdy. Bul da Reseı eliniń astyq eksportyna tyıym salýymen baılanysty bolsa kerek. «Bizdiń buǵan deıin dástúrli túrde astyq jetkizip kelgen naryǵymyzdyń aýqymy da keńı túsedi dep oılaımyn. Óıtkeni, Reseı astyǵynyń birshama bóligi Ortalyq Azııa naryǵyna da quıylyp turatyn, al ol taraptan salynǵan tyıymdy eskersek, biz ózimizdi bundaı naryq keńistiginde erkin sezine bastaımyz», dedi A. Mamytbekov. Onyń aıtýynsha, eksportqa salynǵan tyıymynan keıin Reseıdiń birqatar naryqtan ketýi onyń ornyn avtomatty túrde Qazaqstan basady degendi bildirmeıdi. «Biz bulaı jasaı almaımyz, óıtkeni Reseı jetkizip turǵan aýmaqqa tasymaldaıtyn shyǵynnyń ózi shash etekten. Bizdiń ózimizdiń teńdestirilgen, kepildi naryǵymyz bar, bizge yńǵaılysy sol», dedi A. Mamytbekov.
