Qazaqstan astyq eksportyn 10%-ǵa arttyrdy: Ózbekstan men Aýǵanstanǵa tasymal kúrt ósti
ASTANA. KAZINFORM – 2026 jyldyń alǵashqy jeti aıynda «Qazaqstan temir joly» jelisi arqyly 8,1 mln tonna astyq tasymaldandy. Bul ótken jyldyń sáıkes kezeńimen salystyrǵanda 10%-ǵa artyq.
QTJ málimetinshe, osy kezeńde astyq eksporty da 10%-ǵa ósip, 6,2 mln tonnaǵa jetken. Al untaq ónimderin tasymaldaý kólemi 5%-ǵa artyp, 1,6 mln tonnany qurady.
2025–2026 marketıngtik jyly, ıaǵnı 2025 jylǵy qyrkúıekten 2026 jylǵy shildege deıin temirjol arqyly barlyǵy 14,2 mln tonna astyq tasymaldanǵan. Bul aldyńǵy marketıngtik jyldyń sáıkes kezeńinen 14%-ǵa kóp.
Negizgi ósim Ortalyq Azııa baǵyttarynda baıqaldy. Bıylǵy jeti aıda Ózbekstanǵa 3,1 mln tonna astyq jóneltilip, tasymal kólemi 47%-ǵa artty. Aýǵanstanǵa 605 myń tonna astyq jetkizildi. Bul ótken jylǵy kórsetkishten 4,5 ese kóp.
– Qytaı baǵytynda da tasymal kólemi ósip keledi. Dostyq jáne Altynkól stantsııalary arqyly jeti aıda 449 myń tonna astyq jóneltildi, bul ótken jylmen salystyrǵanda 22%-ǵa artyq. Bul rette astyq tasıtyn vagondardaǵy tasymal kólemi 17 esege – 10 myńnan 170 myń tonnaǵa deıin ulǵaıdy, – dep habarlady QTJ.
Kompanııanyń málimetinshe, astyq tasymaldaýǵa qajetti jyljymaly quram jetkilikti. 2026 jylǵy tamyzdaǵy jaǵdaı boıynsha temirjol jelisinde 15 177 astyq tasymaldaýshy vagon bar. Onyń 6 382-si «Astyq Trans» AQ-ǵa tıesili. Budan bólek, jabyq vagondar parki 17 066 birlikti quraıdy. 2015 jyldan beri qazaqstandyq menshik ıeleri 2 578 astyq tasymaldaýshy vagon satyp alǵan.
Vagondarmen jumys isteý naryǵy 2014 jyldan beri lıberaldandyrylǵan. Astyq tasymaldaýshy vagondar júk jóneltýshilerge operatorlarmen tikeleı jasalǵan sharttar negizinde beriledi. QTJ bul sharttardyń taraby bolyp sanalmaıdy.
Sonymen qatar temirjol ınfraqurylymy da ósip kele jatqan júk aǵynyna beıimdelip jatyr. 2026 jyly 1 577 shaqyrym temirjol jóndelýde, onyń 573 shaqyrymy kúrdeli jóndeýden ótedi. 2025 jylǵy qyrkúıekte Dostyq – Moıynty ýchaskesindegi ekinshi joldar paıdalanýǵa berildi.
Jetigen – Altynkól ýchaskesi men Altynkól stantsııasyn jańǵyrtý jobalarynyń iske asyrylýy aıaqtalyp keledi. Bul Qytaı baǵytyndaǵy temirjoldyń ótkizý qabiletin arttyrýǵa múmkindik beredi.
Ótkizý múmkindigin odan ári keńeıtý úshin Tobyl – Qandyaǵash jáne Shalqar – Beıneý ýchaskelerin jańǵyrtý, sondaı-aq Darbaza – Maqtaaral jańa temirjol jelisin salý jobalary júzege asyrylyp jatyr. Bul Kaspıı teńizi men Ortalyq Azııa elderiniń porttary baǵytyndaǵy poıyzdar qozǵalysyn arttyrýǵa jol ashpaq.
QTJ aldaǵy maýsymdaǵy negizgi táýekelge de nazar aýdardy. Qazan aıynda astyq pen kómir tasymalynyń maýsymdyq sharyqtaý kezeńi bir ýaqytqa sáıkes kelýi múmkin. Osyǵan baılanysty kompanııa júk jóneltýshilerdi ótinimderin aldyn ala berýge, júkterdi birkelki jóneltýge jáne marshrýttyq tasymaldy belsendi paıdalanýǵa shaqyrdy.
Aıta keteıik, buǵan deıin Qazaqstan Eýrazııanyń azyq-túlik habyna aınalyp kele jatqany habarlanǵan bolatyn.
