Qazaqstan astyǵynyń negizgi bóligi qaı elderge eksporttalyp jatyr
ASTANA. KAZINFORM — Qazir astyq eksporty qaı elderge baǵyttalyp jatyr? 2024 jylǵy astyqtyń qanshasy eksportqa shyǵaryldy? Bul suraqtarǵa QR AShM jaýap berdi.
— QTJ derekterine sáıkes, 2024 jyldyń qorytyndysy boıynsha 10,6 mln tonna astyq tasymaldandy (2023 jyly — 11,2 mln tonna), onyń ishinde 2,5 mln tonna respýblıka ishinde (2023 jyly — 2,2 mln tonna) jáne 8,1 mln tonna eksportqa (2023 jyly — 9 mln tonna) jóneltildi, — delingen mınıstrliktiń Kazinform agenttigine bergen jaýabynda.
Elder boıynsha eksport kelesideı bólindi:
— Ózbekstanǵa — 3,3 mln tonna, bul 2023 jylǵy deńgeıden 5%-ǵa tómen (3,45 mln tonna);
— Tájikstanǵa — 1,2 mln tonna, 2023 jyldan 20%-ǵa kóp (1 mln tonna);
— Qyrǵyzstanǵa — 140 myń tonna, 2023 jyldan 1,9 ese kóp (73 myń tonna);
— Qytaıǵa — 1,7 mln tonna, 11%-ǵa tómen (1,9 mln tonna);
— Aýǵanstanǵa — 289 myń tonna, 2023 jyldan 36%-ǵa tómen (449 myń tonna);
— Iranǵa — 526 myń tonna, bul 2023 jyldan 2 ese kóp (245 myń tonna).
— 2024 jyldyń qyrkúıek-jeltoqsan aılarynda jańa ónim astyǵynyń tasymaldaý kólemi 5 mln tonnany qurap, 2023 jyldyń sáıkes kezeńimen salystyrǵanda 50 paıyzǵa artty. Atap aıtqanda, osy kólemniń 1,1 mln tonnasy respýblıka ishinde tasymaldanyp, bul kórsetkish 27 paıyzǵa ósti. Al eksportqa 3,9 mln tonna jóneltilip, 2023 jylmen salystyrǵanda 57 paıyzǵa artyq boldy, — dep naqtylady vedomstvo.
Jańa ónimniń astyǵyn eksporttaýdyń ósýi boıynsha kelesideı kórsetkishter tirkeldi:
— Ózbekstanǵa — 45% (1 mln tonnadan 1,5 mln tonnaǵa deıin);
— Tájikstanǵa — 57% (404 myń tonnadan 633 myń tonnaǵa deıin);
— Aýǵanstanǵa — 51% (126 myń tonnadan 190 myń tonnaǵa deıin);
— Qyrǵyzstanǵa — 19% (63 myń tonnadan 75 myń tonnaǵa deıin);
— Qytaıǵa — 10% (578 myń tonnadan 637 myń tonnaǵa deıin).
— Aıta ketý kerek, bıyl Qazaqstan astyǵyn Iran men Ázerbaıjanǵa jetkizý qaıta jandandy. Iranǵa eksport kólemi 30,3 esege artyp, 15 myń tonnadan 455 myń tonnaǵa jetti. Ázerbaıjanǵa eksport kólemi 188 myń tonnany qurady (2023 jyldyń qyrkúıek-jeltoqsan aılarynda jetkizilimder bolmaǵan), — dep atalyp ótken mınıstrlik aqparatynda.
Eske salsaq, byltyr Qazaqstanda rekordtyq kólemde astyq jınalǵanyn jazǵan edik.
Sonymen qatar, Reseı arqyly Eýropaǵa bıdaı eksporttaý kólemin ulǵaıtý josparlanǵany belgili boldy.