Qazaqstan astyǵy skandınavııalyq naryqqa shyǵýy múmkin
ASTANA. KAZINFORM – Qazaqstan men Shvetsııa agroónerkásiptik keshen salasyndaǵy baılanystardy nyǵaıtyp jatyr. Bul týraly AShM baspasóz qyzmeti habarlady.
Qazaqstan Aýyl sharýashylyǵy mınıstrliginiń vıtse-mınıstri Erbol Tasjúrekov bastaǵan delegatsııa aýyl sharýashylyǵy ǵylymy, tehnologııalar, bilim berý jáne saýda salasyndaǵy ekijaqty yntymaqtastyqty keńeıtý maqsatynda Shvetsııaǵa jumys saparymen bardy.
Qazaqstan tarapynan elimizdiń Shvetsııadaǵy Tótenshe jáne Ókiletti Elshisi Oljas Súleımenov, sondaı-aq S. Seıfýllın atyndaǵy Qazaq agrotehnıkalyq ýnıversıteti men Eginshilik jáne ósimdik sharýashylyǵy ınstıtýtynyń ókilderi qatysty.
Jumys baǵdarlamasy aıasynda Shvetsııa aýyl sharýashylyǵy ǵylymdary ýnıversıtetiniń (SLU) jáne RISE zertteý ınstıtýtynyń basshylyǵymen kezdesýler ótti.
Vıtse-mınıstr halyqaralyq ǵylymı yntymaqtastyqtyń mańyzdylyǵyn atap ótip, turaqty aýyl sharýashylyǵy tájirıbesin engizý jáne «aqyldy eginshilikti» damytý úshin spýtnıktik monıtorıng, ylǵal ólshegishter, drondar men pılotsyz tehnıkany qoldanýdyń ózektiligine nazar aýdardy.
Taraptar birlesken ǵylymı zertteýlerdi, taǵylymdamalardy, sondaı-aq tsıfrlyq jáne bıotehnologııalardy engizý múmkindikterin talqylady. SLU men QazATÝ arasyndaǵy tabysty seriktestikke erekshe kóńil bólindi. Sonyń nátıjesinde qazaqstandyq doktoranttar Shvetsııada taǵylymdamadan ótip, osy eldiń oqytýshylary ǵylymı tálimgerlikke qatysýda.
Al «Trade Scandinavia» kompanııasynyń bas dırektory Dan Olssonmen kezdesý barysynda Qazaqstan astyǵyn skandınavııalyq naryqqa eksporttaý týraly aıtyldy.
— Qazaqstan álemdegi negizgi bıdaı eksporttaýshylardyń alǵashqy ondyǵyna kiredi jáne un eksporty boıynsha aldyńǵy qatarda tur. Qazaqstannyń 24 mln gektardan astam egistik alqaptary, rekordtyq ónimderi men tasymaldaýdy sýbsıdııalaý baǵdarlamalary Eýropa naryǵynda básekelestik turǵydan artyqshylyqtarǵa ıe. Biz EO-men, sonyń ishinde Shvetsııamen júıeli saýdany damytýǵa múddelimiz, — dedi Erbol Tasjúrekov.
Shvetsııanyń Aýyl jáne orman sharýashylyǵy koroldik akademııasynda ótken dóńgelek ústel otyrysynda eldiń ǵylymı jáne iskerlik qurylymdarymen ózara is-qımyl múmkindikteri talqylandy. Ǵylym, bilim jáne bıznestiń ıntegratsııasy talqylaýdyń negizgi taqyrybyna aınaldy. Ózara dıalog yntymaqtastyqtyń tájirıbelik mańyzdylyǵyn jáne taraptardyń birlesken jobalardy damytýdaǵy naqty qadamdarǵa daıyn ekenin kórsetti.
Jumys sapary sońynda delegatsııa Shvetsııanyń Aýyl sharýashylyǵy jáne ınfraqurylym mınıstrliginiń memlekettik hatshysy Danıel Lılebergpen kezdesti. Kezdesýde saýda, agrarlyq ǵylym, tsıfrlandyrý, klımattyń ózgerýine beıimdelý jáne sý resýrstaryn turaqty basqarý máseleleri talqylandy.
— Bul sapar — bizdiń elderimiz arasyndaǵy júıeli ári uzaq merzimdi dıalogqa jasalǵan mańyzdy qadam. Pikir almasý yntymaqtastyqty nyǵaıtýdyń, saýdany damytýdyń jáne birlesken jobalardy júzege asyrýdyń negizine aınalatynyna senimdimin. Mundaı ózara is-qımyl azyq-túlik qaýipsizdigine, ınnovatsııalardy engizýge jáne Qazaqstan men Shvetsııanyń turaqty damýyna yqpal etedi, — dep atap ótti Erbol Tasjúrekov.
Aıta ketelik Azyq-túlik korporatsııasy Qytaımen tsıfrlyq arnalardy iske qosý úshin kelissóz júrgizip jatyr.